Ц.Түвшинжаргал: Үндэсний үйлдвэрлэлийн бүтээгдэхүүнээр хангахад дотоодын компаниудын дэмжлэг хэрэгтэй

Ц.Түвшинжаргал: Үндэсний үйлдвэрлэлийн бүтээгдэхүүнээр хангахад дотоодын компаниудын дэмжлэг хэрэгтэй
“Ньюгрийн лайф” компанийн гүйцэтгэх захирал Ц.Түвшинжаргалтай ярилцлаа.

- Танд энэ өдрийн мэнд хүргэе. Барилгын материалаа өөрсдөө үйлдвэрлэх дотоодын компаниудын тоо нэмэгдэж буй энэ үед танай үйлдвэрийн үйл ажиллагаатай танилцахаар зорьж ирлээ. Бидэнд танилцуулахгүй юу?

- Манай “Ньюгрийн лайф” ХХК нь барилгын хуурай хольц буюу замаска үйлдвэрлэл явуулахаар 2012 онд байгуулагдсан. Импортоор авдаг бараа бүтээгдэхүүнийг эх орныхоо түүхий эдээр дотооддоо үйлдвэрлэсээр өнөөг хүрлээ.

- Барилгын хуурай хольц гэхээр яг ямар төрлийн бүтээгдэхүүнүүдийг танайд үйлдвэрлэж байна вэ?

- Манай үйлдвэр хар, цагаан замаска, плитаны цавуу, хөөсөнцрийн цавуу, гадна фасадны өнгөт чулуун замаска, хөнгөн блокны цавуу, шал тэгшлэгч зэрэг нийт 7 төрлийн бүтээгдэхүүн үйлдвэрлэж байна. Бүтээгдэхүүн тус бүр  барилгын хуурай хольцод тавигдах MNS: 6424-2013 стандартыг бүрэн хангасан.

- Танай үйлдвэрийг бүрэн автоматажсан үйл ажиллагаатай гэж сонсож байсан. Ийм үйлдвэр дотооддоо байтугай, бүс нутагтаа ховор гэж дуулсан юм байна?

- Тийм ээ. Үйлдвэрлэлээ анх эхлүүлж байхдаа бага оврын тоног төхөөрөмжтэй байсан. Улмаар 2016 оны зун ХХААХҮЯамнаас “Жижиг дунд үйлдвэрийг дэмжих төсөл”-ийн хүрээнд 3 тэрбум төгрөгийн зээл авч, үйлдвэрээ бүрэн автомат болгон өргөжүүлсэн. Одоо хоногт 100 тонн бүтээгдэхүүн үйлдвэрлэх хүчин чадалтай болсон. Ийм үйлдвэр манайхаас гадна Казахстан улсад нэг байдаг юм билээ. Бүрэн автомат учраас бүтээгдэхүүний орц жор алдагдах, хөдөлмөрийн аюулгүй ажиллагааны эрсдэл бага зэрэг нь энэ үйлдвэрийн гол давуу талууд юм.



-Тэгэхээр хөдөлмөрийн аюулгүй байдал бүрэн хангагдсан гэсэн үг үү?

- Бүрэн автомат гэдэг үгийн утга учир энд л оршиж байгаа юм. Манай үйлдвэрт одоогоор 20 гаруй хүн ажиллаж байна. Бид мэргэжлийн сургалт, зөвлөгөө, мэдээлэл өгдөг байгууллагуудтай хамтран барилгын материалын үйлдвэрлэл болон Хөдөлмөрийн аюулгүй ажиллагааны чиглэлээр нэмэлтээр байнга сургалт авч  байгаа. 

- Энэ их хөрөнгөөр бүрэн автомат үйлдвэр байгуулна гэдэг өнөөгийн хямралын үед эрсдэлтэй алхам биш гэж үү?

- Тийм ээ. Монголдоо №1-т тооцогдох том үйлдвэртэй болсон учраас хэрэглэгчид аль болох үндэсний үйлдвэрлэлээ дэмжээд өгвөл бидэнд ч их хэрэгтэй. Манай улс барилгын хуурай хольцын бүтээгдэхүүний хэрэглээний 70 гаруй хувийг импортоор авдаг. Энэхүү импортын хэмжээг бууруулж, дотоодын зах зээлийг үндэсний үйлдвэрлэлийн бүтээгдэхүүнээр хангахад дотоодын компаниуд, хувь хүмүүс, төр засгийн дэмжлэг, туслалцаа ихээхэн нөлөөтэйг онцолмоор байна. Бид хэрэглэгчдэдээ чанарыг амладаг учраас үйл ажиллагаандаа итгэлтэй байдаг. Манай үйлдвэрийн гол зорилго нь чанартай бүтээгдэхүүн нийлүүлэх явдал. Хэрэглэгчид манай бүтээгдэхүүнийг туршиж үзээд, үр дүнг нь мэдэрч байгаад авдаг болчихвол хямралын энэ үед энэхүү зээлээ барагдуулж дуусгахад бидэнд ч маш том дэмжлэг болно.

-Импортын ижил төрлийн бүтээгдэхүүнээс танайх юугаараа давуу вэ? Өөрийн эх орны түүхий эдээр бүтээгдэхүүнээ хийдэг гэж дээр хэлэв үү дээ?

- Бид эх орныхоо түүхий эдээр бүтээгдэхүүнээ үйлдвэрлэж байгаа нь импортын бараатай харьцуулахад яах аргагүй давуу тал мөн. Техник технологи өндөр хөгжсөн Орос, Европ цавуу их оруулж ирдэг ч ер нь импортын замасканы 80 хувийг Хятад замаска эзэлчихээд байгаа юм. Гарал үүсэл нь тодорхойгүй, буух эзэн буцах хаяггүй бараа бүтээгдэхүүн худалдан авч хэрэглэнэ гэдэг бол азанд найдсан хэрэг болно гэсэн үг. Харин бид хэрэглэгчдэдээ чанар, баталгаа, ажлын хариуцлагыг амлаж, түүнийгээ хэрэгжүүлж чаддаг учраас манай хамт олныг Монголын хэрэглэгчдийн эрх ашгийг хамгаалах, Үйлдвэр үйлчилгээний салбарын нийгэмлэгээс Бүтээгдэхүүн ажил үйлчилгээгээрээ хэрэглэгчийн таашаалд нийцсэн “Шилдэг хамт олон” цол, “Алтан гэрэгэ” өргөмжлөлөөр шагналаа. Харин энэ шагналыг бид улам их хичээж ажиллах өндөр хариуцлага гэж  харж байна.
 
- Барилгын салбарын ажил өвлийн улиралд сул зогсдог. Танай үйлдвэрийн хувьд?

- Дулаанд холбогдчихсон байгаа барилгууд дотор заслын ажлыг хийхдээ хэрэглэх хар, цагаан замаска, плитаны цавуу болон шал тэгшилгээгээ хийдэг болохоор энэхүү захиалгуудыг нийлүүлэхийн тулд сул зогсолт хийх шаардлагагүй болж байгаа шүү. 



- Танай компанийн гар бие оролцсон бүтээн байгуулалтуудаас дурдаач. Ямар байгууллагуудад бүтээгдэхүүнээ нийлүүлж байна вэ?


Манайх барилгын салбартаа тэргүүлэгч байгууллагууд, хувь хэрэглэгч нартай хамтран ажилладаг. “Эко констракшн” ХХК-ийн КИНГ ТАУЭР , “Эрин интернэшнл” ХХК-ийн “Эрин хороолол”, “Тэлмэн Констракшн” ХХК-ийн  “Шинэ Налайх”, “Болд констракшн” ХХК-ийн ”Чухаг-1, 2”, “Шинэ яармаг”, “Буянт Ухаа-2” зэрэг төслүүдэд бүтээгдэхүүнээ нийлүүлж, хамтран ажиллаж байна. Дээрх төслүүдээс гадна “Дэстинэйшнл Монголиа ХХК”, “Дельта констракшн ХХК ”,  “Батс-Өргөө ХХК”, “Бэрэн групп”, “Эфэс констракшн ХХК” зэрэг 40 гаруй компани болон иргэд, худалдаачид, хувь бригадуудтай хамтран ажиллаж байна.

- Үйлдвэрийн байршлын тухайд...

- Манай үйлдвэр Шувуун фабрикт байрладаг. Хотоос 40-өөд км зайтай юм л даа. Цаашид үйлдвэрээ улам өргөжүүлж, илүү том бүтээн байгуулалт хийх төлөвлөгөөтэйгээр хотоос зайдуу байгуулсан.

- Танай байгууллага нийгмийн хариуцлагын хүрээнд ямар бодлого баримталж ажилладаг вэ?

- Хамгийн сүүлийн жишээ бол жүжигчин Г.Ундармаагийн Хан-Уул дүүргийн нэгдсэн эмнэлэг дэх хүүхдийн тасгийг засварлах ажилд манай байгууллага өөрийн бүтээгдэхүүнээр дэмжлэг үзүүлсэн. Энэ мэтчилэн өмнө нь хийж байсан олон зүйлс бий. Цаашид ч нийгэмдээ нэмэр болох сайн үйлсийг хийсээр байх болно.  

- Цаашдын зорилго, зорилтынхоо талаар ярихгүй юу?

- Хуурай хольцын нэмэлт түүхий эд болох нунтаг цавуунуудыг дотооддоо үйлдвэрлэх зорилго тавьж, химийн лаборатори, үйлдвэрлэл явуулдаг компаниудтай хамтран ажиллаад судалгаа шинжилгээний ажлыг хийж байна. Мөн ISO 9001 стандартыг үйлдвэрлэлд нэвтрүүлэхийг зорилоо. Бид ХБНГУ-ын 100 гаруй жилийн түүхтэй, дэлхийн полимер цавууны талаас илүү хувийг нийлүүлдэг “WACKER” компанитай хамтран ажиллахаар бэлтгэл ажлаа хангаж байгаа. Экспортод бүтээгдэхүүнээ гаргах анхан шатны гэрээ хэлэлцээрүүдийг амжилттай хийж, Герман улс руу бүтээгдэхүүний дээжээ туршилтад явуулаад байна.

- Монголдоо барилгын материалуудыг үйлдвэрлэж, цаашлаад гадны зах зээлд гаргахаар ажиллаж байгаад тань талархаж байна. Гэхдээ хуурай хольцын зах зээлийн ойрын ирээдүйн хандлага ямар байна вэ?

- Саяхан Барилга, хот байгуулалтын яам, Монголын барилгын материал үйлдвэрлэгчдийн холбооны хамтарсан хэлэлцүүлэг болсон. Энэ хэлэлцлүүлгийн үеэр тулгамдсан асуудлуудаа хэлэлцэж, олон ажил хийхээр төлөвлөсөн нь салбарын бүтээн байгуулалтад ихээхэн дэмжлэг болж, тэр хэрээр барилгын туслах материалын үйлдвэрлэл эрчимжих байх. Энэ үед  дотоодын үйлдвэрүүд хуурай хольцын зах зээлийг бүрэн хангахуйц болж байгаа. 

Танай бүтээгдэхүүнийг сонирхсон, худалдан авах хүмүүс та бүхэнтэй яаж холбогдох вэ?

- Манай захиалгын болон борлуулалтын албаны 9444-4125, 9400-4125, 9444-4124 дугаараар холбогдож мэдээлэл авах болон захиалга өгч болно. Мөн манай вэб сайт болох www.ngl.mn болон www.facebook.com/ngl mix-барилгын хуурай хольц фейсбүүк хуудсаар зочлон дэлгэрэнгүй мэдээллээ авч болно.

Холбоотой мэдээ