Бразил болон Парагвай улсын хил залгаа орших нутаг дэвсгэр дээр баригдсан “Itapu Dam” цахимлгаан станц нь 2016 онд 103.09 сая мегаватт/цаг эрчим хүч үйлдвэрлэжээ. Ингэснээрээ тус байгууламж нь дэлхийн хамгийн их хүчин чадалтай усан цахилгаан станц гэдгээ баталсан юм.

  1984 онд ашиглалтад орсноос нь хойш 10 жилийн дараа Америкийн Иргэний барилгын инженерүүдийн нийгэмлэгээс үүнийг “Орчин цагийн дэлхий дээрх инженерчлэлийн долоон гайхамшгийн нэг мөн” хэмээн тодорхойлжээ.



  27 тэрбум долларын өртөг бүхий “Itapu Dam” станцад 18 жилийн туршид 40,000 хүн ажилласан байна. 1975 онд тус станцын барилгын ажил эхэлж, ажилчид нь зам гаргахын тулд Парана гол дундуур 2.1 км урт, 91 метр гүн, 150 орчим метр өргөнтэй голдирол өөрчлөх сувгийг байгуулсан юм. Бүтээн байгуулалтын ажлын явцад 50 сая тонн хад чулуу, шороог зөөж, 12.3 сая м3 бетон (хөлбөмбөгийн 210 стадион барих хэмжээний) хэрэглэжээ. Мөн энэхүү байгууламжид Эйфелийн цамхгаас 380 дахин их хэмжээний ган, төмөр ашигласан байна.



  1980-аад оны эхээр зөвхөн уг станцыг бариулахын тулд Парана голын ойролцоо амьдардаг 10,000 өрх нүүж байсан аж. Анх 1960-аад оны эхэн үед Бразил болон Парагвайн Гадаад хэргийн сайд нар харилцан хэлэлцээр хийж уг цахилгаан станцыг байгуулах санааг гаргажээ. 1966 онд хоёр улсын засгийн газар гэрээнд гарын үсэг зурж, Парана голын усан цахилгаан станцын эрчим хүчний эх үүсвэрийг хуваан ашиглаж байх шийдвэрт хүрчээ.



  Хоёр орны хамтын хэлэлцээрийн нааштай үр дүн болсон уг станц өнөөдөр Бразилийн эрчим хүчний 16 хувийг, Парагвайн эрчим хүчний 76 хувийг хангаж байгаа. Уг систем нь өөрөө усны урсгалаас үүдсэн даралтыг тэсвэрлэх өөрийн жинг найдвартай, тогтвортой байлгаж чаддаг таталцлын далан юм. Далангийн дотор талд усны даралтаас ирэх эргэлтийг цахилгаан үүсгүүрүүдтэй холбодог хэд хэдэн турбинтай аж.

  Далан нь Калифорни мужийн тэн хагасыг хангахуйц 14 гегаватт эрчим хүчийг үйлдвэрлэх хүчин чадалтай юм. Энэ оныг хүртэл буюу 2016 онд 93.5 сая мегаватт цахилгаан үйлдвэрлэсэн Хятадын Three Gorges Dam нь дэлхийн хамгийн том цахилгаан станцаар нэрлэгдэж байсан билээ. Тэгвэл 195 метр өндөр, 7925 метр урт хэмжээтэй “Itapu Dam” нь мөн л дэлхийн хамгийн том сэргээгдэх эрчим хүчний цогцолбор хэмээн тооцогдож байна.