Азийн 13 улсын барилгын инженерүүд Монголд чууллаа

Азийн 13 улсын барилгын инженерүүд Монголд чууллаа

  Олон улсын барилгын тэргүүлэх зэргийн инженерүүд, судлаачид, эрдэмтдийн туршлагаас судлах, шинэ дэвшилтэт технологи, стандартуудын талаар мэдлэг мэдээллийг барилгын инженерүүд, архитекторууддаа хүргэх зорилготойгоор Монголын барилгын инженерүүдийн холбооноос Азийн барилгын инженерүүдийн зохицуулах зөвлөл (АБИЗЗ)-ийн Гүйцэтгэх хорооны 33 дугаар хурлыг Улаанбаатар хотноо зохион байгууллаа.

  Өнгөрөгч есдүгээр сарын 21-нээс 23-ны өдрүүдэд Улаанбаатар хотноо үргэлжилсэн энэ хурал нь барилгын инженерүүдээ олон улсын холбоодын гишүүнчлэлтэй болгож, тэдний мэргэжлийн ур чадвар, мэдлэгийг хөгжүүлэхэд үнэтэй хувь нэмэр оруулна гэдэгт найдаж байгаагаа тус холбооны ерөнхийлөгч Б.Мөнхбаяр мэдэгдэж байлаа.

  Барилга, Хот Байгуулалтын Сайдын дэмжлэгтэйгээр зохион байгуулсан тус хуралд зөвлөлийн тэргүүн, нарийн бичгийн дарга нар болон Америк, Бангладеш, Вьетнам, Индонез, Балба, Пакистан, Солонгос, Тайвань, Филиппин, Энэтхэг зэрэг 13 улсын барилгын инженерүүдийн холбоодын ерөнхийлөгч, гадаад харилцааны албаныхан, их, дээд сургуулиудын профессор, доктор, инженер бүхий 47 төлөөлөгч оролцлоо.

  Энэ удаагийн хурлын хүрээнд эхний өдөр Техникийн Зохицуулах Хорооны уулзалтыг хийж, Барилга, Хот Байгуулалтын Сайд Г.Мөнхбаяр хуралд хүрэлцэн ирсэн төлөөлөгчдөд мэндчилгээ дэвшүүлэн, Азийн улс орнуудыг өргөн хүрээнд хамруулсан энэхүү арга хэмжээг Монголын барилгын инженерүүдийн холбоо зохион байгуулж байгааг сайшааж, дэмжиж байгаагаа илэрхийлсэн юм. Тэрээр, “Салбарын ууган төрийн бус мэргэжлийн байгууллагуудын нэг болох Монголын барилгын инженерүүдийн холбоотой салбарын инженер, мэргэжилтнийг олон улсад хүлээн зөвшөөрөгдөхүйцээр бэлтгэх, тасралтгүй хөгжүүлэх, сургах үйл ажиллагааг гэрээгээр хэрэгжүүлэх шат дараатай ажлыг хамтран хэрэгжүүлж эхлээд байна. Үүнд та бүхэн идэвхтэй оролцож, туршлага солилцон ажиллана гэж найдаж байна. Та бүгдийн уулзалтад өндөр амжилт хүсье” гэсэн юм.

  Мөн Азийн барилгын инженерүүдийн зохицуулах зөвлөлийн тэргүүн доктор Осаму Кусакабе хурлыг нээж хэлсэн үгэндээ, “Манай Азийн барилгын инженерүүдийн зохицуулах зөвлөлийн Гүйцэтгэх хорооны 33-р хурлыг өөрсдийн сайхан эх орондоо зохион байгуулж, биднийг найрсгаар хүлээн авч байгаад бид талархаж байна. Барилга, хот байгуулалтын Сайдын зүгээс арга хэмжээг маань дэмжин хүлээн авч буй нь бидний хувьд нэр төрийн хэрэг юм. Монголын барилгын инженерүүдийн холбоогоор дамжуулан Монголын барилгын салбарын хөгжилд бидний оролцоо, хувь нэмэр, бүхий л тусламж дэмжлэгийг үзүүлэхдээ бид баяртай байх болно. Энэ Зөвлөлийн үйл ажиллагаа бүрт Монголын барилгын инженерүүдийн холбоо маш идэвхтэй оролцож, өөрсдийн санал санаачилгыг байнга илэрхийлж байдаг билээ. Цаашид ч улам нягт хамтран ажиллана гэдэгт итгэж байна.” гэлээ.

  Гүйцэтгэх хорооны 33-р хурлын хүрээнд Зөвлөлийн Техникийн хороо, Төлөвлөлтийн хороодын уулзалт, Ирээдүйн манлайлагчдын форум, “Хөгжиж буй орнуудын хотжилтын бэрхшээл ба туршлага” сэдэвт олон улсын семинар гээд хэд хэдэн арга хэмжээ болсон юм.

  2017 оны дөрөвдүгээр сард Балба улсад зохион байгуулагдсан Ирээдүйн манлайлагчдын форумын анхдугаар уулзалтын удаах нь ийнхүү манай улсад болж, Монголоос 19 залуу инженер оролцлоо. Форумын зорилго нь АБИЗЗ байгууллагын үйл ажиллагааг цаашид уламжлан авч явах залуу манлайлагчдыг бэлдэхэд оршиж байгаа аж. Форумд Монголын барилгын инженерүүдийн холбооны гишүүн арван инженер өөрсдийн байр суурь, үзэл бодлоос хуваалцаж, шинэ санал санаачилгаа илэрхийлэн оролцсон юм.  

  Мөн дотоодын гишүүд, инженерүүддээ зориулан зохион байгуулсан "Хөгжиж буй орнуудын хотжилтын бэрхшээл ба туршлага" сэдэвт олон улсын семинарыг Барилгын хөгжлийн төвд зохион явууллаа.

  Семинарыг нээж БХБЯ-ны Хот байгуулалт, газрын харилцааны бодлогын хэрэгжилтийг зохицуулах газрын дарга Б.Гүнболд үг хэлж, "Монгол Улсын Шинэ хотжилтын хөтөлбөр" сэдвээр илтгэл тавьснаас онцолбол, "Монгол Улсын Тогтвортой хөгжлийн үзэл баримтлал - 2030" болон Монгол Улсын үндэсний аюулгүй байдлын үзэл баримтлалд уур амьсгалын өөрчлөлтөд дасан зохицох чадавхийг бий болгох, экосистемийн тэнцвэрт байдлын алдагдлыг зогсоох, хамгаалах замаар тогтвортой хөгжлийн орчин бий болгох зорилтуудыг тусгасан... Манай улсад дэд бүтцийн салбарт санхүүжилт хангалтгүй байгаагаас урт хугацааны хөрөнгө оруулалтын эх үүсвэрийг төрөлжүүлэх нь чухал байна. Үүний нэг эх сурвалж нь хувийн хэвшлийн оролцоо юм. Ингэхдээ, арилжааны банкуудаас зээл авах, орон нутгийн бонд гаргах, Төр, хувийн хэвшлийн түншлэлийг хэрэгжүүлэх замаар хөрөнгийн эх үүсвэрийг нэмэгдүүлэх боломжтой.” гэдгийг дурдсан юм.

  Мөн Монголын барилгын инженерүүдийн холбооны ерөнхийлөгч Б.Мөнхбаяр семинарт хэлсэн үгэндээ, “Бидний тавьсан саналыг найрсгаар хүлээн авч энэхүү семинарыг баяжуулан, эрдэмтэд, мэргэжилтнүүдээ оролцуулж байгаа холбооддоо Монголын барилгын инженерүүдийн холбооны нийт гишүүдийн өмнөөс талархал илэрхийлье. Семинарт тавьж буй илтгэлүүд манай архитектор, инженер, мэргэжилтнүүдийн хөгжил, оюунд үнэтэй хувь нэмэр оруулна гэдэгт илтгэлтэй байна. Семинарт хүрэлцэн ирсэн гадаадын болон дотоодын зочид та бүхэндээ амжилт хүсье.” гэжээ.  

  Семинарт Азийн хотуудад тулгамдаж буй асуудал, бэрхшээл болон шийдвэрлэх арга замууд, мөн ирээдүйн хот төлөвлөлтийн хөгжлийн чиг хандлагын сэдвүүдийг хөндсөн илтгэл, судалгааны ажлуудаа долоон илтгэгч танилцуулж, хэлэлцүүлгийг явуулсан юм. Тус семинарын оролцогч гадаадын 43, Монголын 50 инженерт нэг кредит цаг тооцох гэрчилгээ олгож, илтгэлийн эмхтгэлийг тараасан байна.

  Гурван өдөр үргэлжилсэн эдгээр арга хэмжээний төгсгөлд гадаадын инженер, төлөөлөгчдөд сүүлийн жилүүдэд манай улсад хэрэгжүүлсэн томоохон бүтээн байгуулалтын жишээ болсон Шинэ нисэх онгоцны буудлын талбай үзүүлэх техникийн  аялал, Монгол ахуй, өв соёл, үндэсний дуу хуур, зоогтой танилцуулах аяллыг хийлээ. 
 

Холбоотой мэдээ