Монголбанкны захиалгаар Үл хөдлөх хөрөнгийн Тэнхлэг зууч компанийн хараат бусаар хийсэн “Орон сууцны үнийн индекс”-ийн судалгааны 2016 оны 11-р сарын үр дүнг танилцууллаа.

   Өнгөрсөн сард зах зээл дээр борлогдож байгаа шинэ орон сууцны үнэ өссөн ч, хуучин орон сууцны үнэ бага зэрэг буурсан нь орон сууцны үнийн индекс буурахад нөлөөлжээ.

   2013 оны 1 дүгээр сараас эхлэн орон сууцны үнийн индексийг тооцсон бөгөөд орон сууцны үнийн жилийн өсөлт 2014 оны 3 дугаар сард хамгийн өндөр буюу 23.7%-тай гарсан байна. 2014 оны 12 дугаар сараас орон сууцны үнэ (өмнөх оны мөн үетэй харьцуулахад) буурч эхэлсэн бөгөөд орон сууцны үнийн бууралт үргэлжилсэн хэвээр байна. Харин 2016 оны 6 дугаар сараас орон сууцны үнийн индексийн бууралтын хурд саарч 2016 оны 11 дүгээр сарын байдлаар -5.5%-д хүрээд байна.

   Тус судалгаагаар өнгөрсөн 11-р сард Орон сууцны үнийн ерөнхий индекс 0.8 хувьтай гарлаа. Энэ нь өмнөх сараас 0.3 хувиар буурсан үр дүн юм. Ерөнхий индексийг оны эхэн үетэй харьцуулахад 4.4 хувь, өнгөрсөн оны мөн үетэй буюу 2015 оны 11-р сарын үр дүнтэй харьцуулахад 5.5 хувиар буурсан байна.