Сөүлд 200 чингэлгээр томоохон худалдааны төв барьжээ

Сөүлд 200 чингэлгээр томоохон худалдааны төв барьжээ

     Та дэлгүүр хэсэх дуртай, эсвэл архитектур сонирхдогийн аль нь ч байлаа гэсэн Сөүл хотод очвол шинэхэн худалдааны төвөөр нь заавал ороод гараарай. Өмнөд Солонгосын нийслэл хотноо байх уг дэлгүүр нь зөөврийн чингэлгээр байгуулсан хамгийн том байгууламж юм. Сүүлийн жилүүдэд чингэлгээр янз бүрийн барилга, амины орон сууц барих нь ихэссэн ч үүн шиг том бүтээн байгуулалт анхны тохиолдол болж байна.

    “Urbantainer” компани загварыг нь зохион бүтээж, 5,300 м.кв талбайтай тус барилгыг 200 ширхэг том угсармал чингэлгээр барьсан бөгөөд шаардлагатай тохиолдолд зөөж, задалж, дахин угсрахад хялбар байлгахаар тохируулсан аж.

     Сөүл хотын Гванжин дүүрэгт байрлах “Common Ground” гэх уг барилга нь урьд өмнө хотын төвд ашиглаж байгаагүй материалаар барьсан, шинэлэг зүйл болжээ. Чингэлгийг ийнхүү байгууламжид ашигласнаар барилгын зардлыг хэмнээд зогсохгүй, угсралтын ажлын хугацааг богиносгож, тавхан сард багтаан гүйцэтгэсэн ихээхэн давуу талтай төсөл болсон байна.



     Чингэлэг тус бүрийг хооронд нь нийлүүлж, хоёр гол хэсэг бүхий гурван давхар барилга угсарч, бүхэлд нь нүдэнд дулаахан хөх цэнгэр өнгөөр будаж, янзалжээ. Худалдааны танхим, Гудамжны худалдаа гэсэн хоёр танхимтай аж. Гол талбайд амралтын өдрүүдийн худалдаа, үзэсгэлэн, арга хэмжээнүүд зохион байгуулах зориулалттай гэнэ.



     “Гудамжны худалдааны хэсэг нь нарийн гудмуудаас бүрдэх бөгөөд чингэлгийн ширхэгүүдийг өвөрмөц өнгө төрх болгон харагдуулж чадсан. Хооронд нь нийлүүлж, том худалдааны танхим болгосон хэсэгт хүмүүс яг л зах дотор явж байгаа мэт сэтгэгдэл төрүүлэхийг зорьсон. Дотор хэсэгт нь мөн чингэлэг байрлуулсан нь бас нэгэн өвөрмөц санаа ажээ”.



     Уламжлалт барилгын шинж чанарыг эвдэж, шинэлэг болсон энэхүү “Common Ground” барилга эрч хүчтэй, залуу дизайнеруудын бүтээл бөгөөд дунд түвшний дэлгүүр, редакцийн дэлгүүрүүд, зонхилох брэндүүдийг худалдаалдаг, хүмүүсийн өргөнөөр үйлчлүүлэх худалдааны төв болж чаджээ. 200 гаруй зөөврийн чингэлгээр ийнхүү 7 дэлгүүр, 20 орчим зоогийн газар, дээврийн террастай өвөрмөц, гоёмсог байгууламжийг Сөүл хотод очвол заавал үзээрэй.























 

Холбоотой мэдээ