Гэр хорооллын нутаг дэвсгэрийг “Гэр хорооллын иргэдийн хүсэлт, санаачилга, чадамжид суурилан иргэний өмчлөлийн газар, амины орон сууцанд нь инженерийн хангамжийн үйлчилгээг хүргэж, төрийн болон нийгмийн үйлчилгээг ойртуулж, орчин цагийн хотын соёл, нийгмийн хэрэгцээ шаардлагад нийцсэн эрүүл аюулгүй, тохилог орчин болгон хөгжүүлэх”-д чиглэгдсэн Гэр хорооллын инженерийн хэсэгчилсэн үзэл баримтлал "Сервис Центр" төслийг Нийслэлийн Засаг Даргын Зөвлөлөөр хэлэлцэн баталлаа. 

  Барилга угсралтын тэргүүлэгч таван компанийн нэгдэл "Үндэсний бүтээн байгуулалтын корпораци"-ийн санаачлан дэвшүүлсэн уг төсөл ийнхүү батлагдсанаар 2017 онд гэр хорооллын нутаг дэвсгэрт гурван "Сервис Центр"-ийг туршилтаар байгуулах аж.

   Иргэдийн өөрсдийнх нь хүсэлт санаачилга, чадамжид суурилж иргэний өмчлөлийн газар, амины орон сууцанд нь нэгдсэн зохион байгуулалттайгаар хэсэгчилсэн инженерийн хангамжийн үйлчилгээг хүргэх, төр болон нийгмийн үйлчилгээг ойртуулах замаар тухайн эрүүл аюулгүй, тохилог орчин бүрдүүлэн хөгжүүлэхийг зорьсноороо энэ нь бусад төслүүдээс ихээхэн ялгаатай, бас чухал онцлогтой. Цаашлаад нийгмийн тулгамдсан асуудал болоод буй агаарын бохирдол, түүхий нүүрснээс ялгарах утааны асуудал, хөрсний бохирдлыг арилгах  боломжтой болно.

   Мөн Гэр хорооллын нутаг дэвсгэрийг нэгдсэн зохион байгуулалтад оруулж, инженерийн хангамжийг хүргэснээр газар, үл хөдлөх хөрөнгийн үнэ цэнэ нэмэгдэж, эдийн засгийн эргэлтэд орох нөхцөл боломж бүрдэнэ. Улмаар дагуул хот, тосгоны хөгжил түргэсэж, хотын төвийн нягтаршил буурах, жижиг дунд үйлдвэрлэл кластераар хөгжих гэх мэт олон сайн талтай. Хамгийн гол нь иргэдийн эрүүл мэнд, амьдрах орчин, нөхцөлд сөрөг нөлөө үзүүлэгч агаарын бохирдол, хөрсний бохирдол зэрэгт бодитоор нөлөөлнө.