Брүклин дэх 22 акр бүхий Номхон далайн цэцэрлэгт хүрээлэнгийн мега төсөл болох “461 Dean” нээлтээ хийж байна. “Forest City Ratner” компанийн захиалгаар “SHoP Architects”-ийнхэн интерьер дизайны ажлыг гүйцэтгэсэн дэлхийн хамгийн өндөр буюу 32 давхар модульчлагдсан уг барилга өчигдөр албан ёсоор үйл ажиллагаагаа эхэллээ.

     Нийт 363 түрээсийн орон сууцнаас бүрдэж буй “461 Dean” нь энэ төрөлдөө хамгийн анхны барилгад тооцогдож байна. Цамхагийн 60 хүртэлх хувь нь Брүклин Нэви Яард орчимд угсрагдсан юм. Угсрагдсан хэсгийг барилгын талбай руу зөөвөрлөж, нөгөө хэсэгтэй нь нийлүүлсэн бөгөөд энэ нь эрчим хүчний хэрэглээг 67 хувиар бууруулж, барилгын хог хаягдлыг 70-90 хувиар бууруулах давуу талтай юм.





     “Зөөвөрлөж угсарсан барилга нь хүрээлэн буй орчинд үзүүлэх сөрөг нөлөөг бууруулж, өнөөгийн хотуудад шаардлагатай барилгын үйлдвэрлэлийн бүтээмжийг нэмэгдүүлэх онцгой ач холбогдолтой. Энэ бол Нью-Йорк болон бусад хурдацтай хөгжиж буй хотуудыг орон сууцжуулах ажлыг хурдацтай явуулах зорилготой туршилтын төсөл юм” хэмээн “SHoP Architects”-ийн удирдлага ярьлаа.



     Тус төсөл нь байгаль орчинд ээлтэй барилгуудад олгодог “LEED”-ийн мөнгөн гэрчилгээг хүртсэн билээ. Олон өнгийг хослуулсан уг цамхаг Барклэй төвийн ард Dean гудамж, Flatbush-ийн өргөн чөлөөнд байршилтай.

     “461 Dean” барилгад 130 танхим, нэг өрөөтэй 180 орон сууц, хоёр өрөөтэй 20 орон сууцтай аж. Тэдгээрийн 50 хувийг олон нийтэд нээлттэй болгосноор 84,000 хүн өргөдөл өгч, сугалаанд оролцсон байна.



    68 м.кв талбайтай танхимууд нь өнцгийн зохион байгуулалттай бөгөөд сарын түрээсийн үнэ нь 3,200 орчим доллар орчим болох аж. Харин орон сууцнууд нь байгалийн гэрлийг хангалттай тусгахуйц том цэлгэр цонхтой, Брүклин болон Манхэттаныг харах боломжтой.



    Шинэхэн нээгдэж буй учир компанийн зүгээс түрээсийн үнийн хөнгөлөлт үзүүлж, оффис өрөөг 2,450 доллар, нэг өрөө байрыг 3,125 доллар, 2 өрөө байрыг 4,750 доллараар түрээслүүлэхээр болжээ.