Замын бүтээн байгуулалт эхэлж байгаа энэ үед нийслэлд өнөө жил баригдах замуудыг танилцуулъя.

Улаанбаатарт гадаадын зээл тусламж, нийслэлийн төсөв, нийслэлийн авто замын сан, Хөгжлийн банкны санхүүжилт гэсэн 4 эх үүсвэрээр замын бүтээн байгуулалт өрнөх аж. Гадаадын зээд тусламжийн хөрөнгө оруулалт буюу урд хөршийн хөнгөлөлттэй зээлийн санхүүжилтээр Яармагийн шинэ гүүрийг барьж, хуучныг нь засварлана.

Мөн Замын цагдаагийн газрын ойролцоо гүүрэн гарч барих гэнэ. Үүнээс гадна Баянзүрхийн болон Сонсголонгийн авто зам дээр Туул гол дээгүүр төмөр бетонон гүүрүүд шинээр барихаар болжээ.

Гачууртын уулзвараас Налайх-Чойрын замын уулзвар хүртэлх 9 км авто замыг өргөтгөж шинэчлэх ажил ч багтаад байна.

Зам тээврийн хөгжлийн яамны захиалгаар Яармагийн авто замаас Хөшгийн хөндийн нисэх онгоцны шинэ буудал хүртэлх 32,2 км хурдны авто зам барих төсөл энэ онд үргэлжилнэ.

Нийслэлийн төсвөөр Хайлаастын уулзвараас Дарь Эхийн зам хүртэлх авто замыг Сэлбэ гол дээгүүрх шинэ гүүрний хамт барих аж. Их тойруугийн хойд хэсэгт буюу Сансрын шатахуун түгээх станцын дэргэд явган хүнд зориулсан гүүрэн гарч барих ажил энэ зун өрнөх юм. Хан-Уул дүүргийн 11 дүгээр хороонд аялал жуулчлалын авто замыг шинэчлэхээр болжээ.

Хөгжлийн банкны санхүүжилтээр Орбитын уулзвараас Толгойтын эцэс, Үйлдвэрчний эвлэлийн гудамж хүртэлх 3,6 км авто замын өргөтгөл шинэчлэлтийг үргэлжлүүлэх юм байна.