“Барилга.МН” сэтгүүлийн шинэ дугаараас интернэт маркетингийн тухай

“Барилга.МН” сэтгүүлийн шинэ дугаараас интернэт маркетингийн тухай

  Сар бүр уншигчдадаа хэрэгцээт мэдээллийг нь хүргэж байдаг “Барилга.МН” сэтгүүлийн 6-р сарын шинэ дугаар уншигч та бүхний гарт хүрэхэд бэлэн боллоо.

  Сэтгүүлийн энэ удаагийн дугаарын зочноор үүсэн байгуулагдаад 10 дахь жилийнхээ ойн баярыг тэмдэглэж буй хот төлөвлөлт, барилгын зураг төслийн “ЭН ЭЙ ПИ ГРУПП” ХХК-ийн Захирал, ахлах архитектор М.Уянгыг урьж, залуу архитектор бүсгүйн ажиллах арга барил, түүний үзэл бодлыг хуваалцан ярилцлаа.



  Мөн манай улсад байгуулагдаж буй анхны ногоон сургуулийн тухай, ногоон барилгын ач холбогдлын талаарх ярилцлага, товчхон танилцуулга бэлтгэснийг сэтгүүлийн “Нэг сэдвээр” булангаас хүлээн авч уншаарай.

  НМХГ-ын шалгалтаар илэрсэн БНХАУ-ын Мэн гай цементийг хуурамчаар үйлдвэрлэсэн мөрөөр сурвалжилсан сэтгүүлчийн нийтлэлд "хуурамч цемент" гэж юу болох, түүнд ямар хольцуудыг хийж иргэдийг хууран мэхэлдэг болох талаар дэлгэрэнгүй мэдээлэл авч болно шүү.



  Орон сууцны үнэ ханшийн мэдээллээс гадна цаашид үнэ өсөх үү, буурах уу гэсэн та бүхний таамагт манай сэтгүүлчийн бэлтгэсэн бичвэр хэрэг болох болов уу. Түүний энэхүү бичвэрээс байрны үнийн талаарх сонирхолтой баримтуудыг уншиж, харьцуулалт хийгээд үзээрэй.

  Түүнчлэн төслөө амжилттай хэрэгжүүлэхэд тань тулгарч болох эрсдэл, түүнийг даван туулах стратегийн талаарх зөвлөгөөг СЭЗИС-ийн багш, дэд профессор, “Барилга.МН” сэтгүүлийн Бодлогын зөвлөлийн гишүүн Ж.Дэлгэрсайхан бэлтгэн хүргэж байна.

  Харин “Грийнсофт” компанийн захирал Э.Амартай олон нийтийн сүлжээ, дижитал, интернэт маркетингийг барилгын салбарт хэрхэн оновчтой ашиглаж, сурталчилгааны зардлаа хэмнэнгээ борлуулалтаа сайжруулах боломжийн тухай дэлгэрэнгүй ярилцлага бэлтгэлээ.



  Сэтгүүлийн бодлогын зөвлөлийн гишүүн, Монгол Улсын Зөвлөх архитектор З.Оюунбилэгийн “Улсын хамгаалалтад авах учиртай Маршалын өргөө” нийтлэлийг уншиж, нэг тунгаагаад үзээрэй. Энэхүү түүхэн дурсгалт барилгыг яагаад хамгаалалтад авах ёстой болохыг тэрээр баримт, зурагтайгаар өгүүлжээ.



  Урин дулааны улиралд амины орон сууцаа өөрсдөө барих гэж буй иргэддээ зориулан хямд өртөгтэй жижиг байшин барих, хувийн сууцандаа бохир зайлуулах систем суурилуулах мэргэжлийн зөвлөмжийг хүргэж байна. Харин хэрэглэгчдэд зориулсан булангаас “Хөөсөнцөр хавтангийн угсралт” зөвлөмжийг аваарай.





  Барилгын салбарт ажиллаж буй, орон сууцандаа засвар хийх гэж буй, байшин барихаар төлөвлөсөн хэн бүхэн манай сэтгүүлээс үнэтэй зөвлөмжүүдийг цаг алдалгүй авах боломжтойг дуулгая.

Холбоотой мэдээ