“Бүтээн байгуулагчдаа дэмжье” уриан дор Орон сууц, ногоон барилга болон Барилгын материал, дэвшилтэт технологи гэсэн хоёр чиглэлээр зохион байгуулагдсан “Barilga Expo 2017” олон улсын үзэсгэлэн яармаг өчигдөр хаалтын ажиллагаагаа хийлээ.

  Энэхүү үзэсгэлэн яармаг нь барилгын салбарын аж ахуйн нэгжүүдээ хамруулж, тэдний бүтээн байгуулсан орон сууц, үл хөдлөх хөрөнгө, дотоодын үйлдвэрлэгчдийнхээ бараа бүтээгдэхүүн, ханган нийлүүлэгчдийн бизнес саналууд, шинэ дэвшилтэт техник технологийг нэгэн дээвэр дор, өргөн хүрээнд хүртээмжтэйгээр сурталчилж үйл ажиллагааг нь дэмжих зорилготой билээ.



  Ялангуяа эдийн засгийн хүндрэлтэй өнөөгийн нөхцөлд бизнес эрхлэгчид маркетинг борлуулалтын маш бага зардлаар, өндөр үр ашигтайгаар зорилтот хэрэглэгчдэдээ бүтээгдэхүүн үйлчилгээгээ хүргэж, гадаад ба дотоодын хөрөнгө оруулагчидтай хамтран бизнесийн харилцаа холбоогоо өргөжүүлэх өргөн боломжийг уг үзэсгэлэн олгосон юм.

  Түүнчлэн шинэ орон сууц авах гэж буй хэрэглэгчдэд хайсан байраа нэг дороос олж сонголтоо хийх, амины орон сууц барих гэж буй иргэдэд бараа материалаа үнэ болон брэндийн өргөн сонголтоос худалдан авалт хийх нөхцөлийг бүрдүүлдэг нь бас нэгэн давуу тал юм.

 Энэ жилийн “Barilga Expo 2017”-ийн нэгэн онцлог нь иргэд, оролцогчдын дунд үнэ төлбөргүй зохион байгуулсан сургалт, семинарууд байлаа. Үүнд: амины орон сууцаа өөрсдөө барих, барилгын шинэ материал, дэвшилтэт технологитой танилцах, ашиглах арга зүйн талаарх зөвлөмжүүд багтлаа.



  Үзэсгэлэнгийн хаалтын ажиллагаанд “Barilga Expo 2017” олон улсын үзэсгэлэн яармагийн Зохион байгуулах хорооны дарга Г.Батсүх, Барилга, хот байгуулалтын яамны Нийтийн аж ахуйн бодлогын хэрэгжилтийг зохицуулах газрын дарга О.Лхагвацэдэн, Монголын барилгын материал үйлдвэрлэгчдийн холбооны тэргүүн М.Түмэнжаргал, Монголын барилгын үндэсний ассоциацийн Зөвлөх н.Бямбажав нар оролцож, шилдэг оролцогч компаниудыг шалгаруулан Батламж гардууллаа.

“Barilga Expo 2017” олон улсын үзэсгэлэн яармагийн шилдгүүд:

1.         Шилдэг төсөл хөтөлбөр хэрэгжүүлэгч - “Монголын Алт” (МАК) ХХК



Уул уурхай, барилгын материалын төсөл болон үйлдвэрлэл, хөдөө аж ахуй, агаарын тээвэр, үл хөдлөх хөрөнгө зэрэг чиглэлээр үйл ажиллагаагаа явуулж байгаа Үндэсний хөрөнгө оруулалттай, Монгол Улсын тэргүүлэх компаниудын нэг “Монголын Алт” (МАК) ХХК.

2.         Шилдэг үйлдвэрлэгч  - “Ньюгрийн Лайф” ХХК



2014 онд хоногт 100 тонн бэлэн бүтээгдэхүүн үйлдвэрлэх хүчин чадалтай, 100 хувь дотоодын хөрөнгө оруулалтаар хуурай хольцын автоматажсан томоохон үйлдвэрийг ашиглалтад оруулсан “Ньюгрийн Лайф” ХХК.

3.         Шилдэг ханган нийлүүлэгч – “Хүннү Конкрет” ХХК



Техник технологиор манлайлж, сүүлийн жилүүдэд барилгын салбарт хүч түрэн орж ирж буй “Хүннү Конкрет” бетон зуурмагийн үйлдвэр.

4.         Шилдэг дэвшилтэт технологи нэвтрүүлэгч – “ABB” группын Монгол дахь төлөөлөгчийн газар



Эрчим хүч, автоматжуулалтын технологиороо дэлхийд тэргүүлэгч “ABB” группын Монгол дахь төлөөлөгчийн газар.

5.     Шилдэг шинэ орон сууц – “Монкон констракшн” ХХК-ийн Мандала Хотхон


 

Их хотынхоо Үндэсний цэцэрлэгт хүрээлэнгийн өнгө үзэмжийг тольдон харж, цэвэр агаарт ногоон байгууламж, тав тухтай орчныг бүрдүүлсэн Мандала хотхоныг оршин суугчиддаа зориулан бүтээн байгуулж буй “Монкон констракшн” ХХК

6.      Шилдэг бүтээгдэхүүн – “Монцемент билдингс материалс” ХХК


 

Чанараараа тэргүүлэгч үндэсний брэнд, “Бат бэх хөгжлийн суурь” уриатай “Монцемент билдингс материалс” ХХК.







  “Barilga Expo 2017” олон улсын үзэсгэлэнд жил бүр идэвхтэй оролцож, өөрийн бүтээгдэхүүн үйлчилгээ, шинэ санаачилга, талбайн тохижилтоороо бусдыгаа манлайлсан шилдэг аж ахуйн нэгжүүд, мөн ОХУ, БНХАУ-аас хэд хэдэн компани идэвхтэй оролцсон түнш байгууллагууд болон нийт оролцогчдодоо талархал илэрхийлж байна.

  Жил ирэх тусам оролцогчид, үзэгчдийнхээ хүрээг тэлсээр байгаа энэхүү үзэсгэлэн яармагийн дараагийн ээлжинд оролцох боломж та бүхний өмнө хэзээд нээлттэй байх болно шүү.