Зурагт харуулж буй байшинг гаднаас нь харахад энгийн мэт боловч үндсэндээ томоохон хувьсал хийж чадсан сууц юм. Нийт 130 орчим м.кв талбайтай, Леготой төстэй дахин боловсруулсан тоосгоор барих ийм сууцны өртөг нь 6,800 ам.доллар болох аж. Харин үүнийг 4 хүнтэй баг барьж гүйцэтгэхэд ердөө таван хоногийн хугацаа зарцуулах юм.

Колумбийн Кундинамаркад барилгын материалыг зөөж тээвэрлэхэд бэрх тул Фернандо Лианос дахин боловсруулсан хуванцар ашиглахаар шийдсэн байна. Тэрээр архитектор Искар Мендезтэй хамтран тухайн байршилдаа хаягдал хуванцрыг дахин боловсруулж хямд төсөр зардлаар байшин барих технологийн дэвшлийг хэрэгжүүлж эхэлжээ.

  Хүрээлэн буй орчинд үзүүлэх хор хөнөөлийг эрс бууруулсан энэхүү шийдлийг гаргахдаа тэд шинэ хуванцар ашигласнаас хаягдал хуванцрыг дахин ашиглах нь илүү хялбар болохыг бодолцож үзжээ.

 Хуванцар тоосгыг хийхдээ нутгийн үйлдвэрлэгчдээс, дахин боловсруулагчдаас хуванцар авч, хайлуулан цутгаж хэлбэрт оруулдаг аж. Цутгасан хуванцар тоосго нь дулаан тусгаарлалт сайтай, галд тэсвэртэй, газар хөдлөлтийн шаардлагыг хангасан бүтээгдэхүүн гэдгийг үйлдвэрлэгчид нь онцолж байгаа юм.

  2011 онд байгуулагдсанаас хойш тэдний компани ажилчдынхаа тоог 15 хүртэл нэмэгдүүлж, Колумбид шилжин суурьшсан 42 айл өрхөд дээрх тоосгоор байшин барьж өгчээ. Тэд одоогоор үйл ажиллагаагаа өргөжүүлэх тусламжийг авч, “The Chivas Venture” сангаас 300,000 ам.долларын санхүүгийн дэмжлэг авахаар болжээ.