Нийслэл хотод хэрэгжүүлж, гүйцэтгэх хөрөнгө оруулалтын ажлуудыг нэгтгэн танилцуулдаг “Улаанбаатар – Хөрөнгө оруулалт 2017” бизнес чуулга уулзалт өнөөдөр зохион байгуулагдлаа.

   Төр болон хувийн хэвшлийн хамтын ажиллагааг хөгжүүлэх замаар нийслэлийн эдийн засгийн хөгжлийг дэмжих, бизнес эрхлэгчдийн эрх ашгийг хамгаалах, иргэд, аж ахуйн нэгж байгууллагуудад хөрөнгө оруулалт, бизнесийн таатай орчин нөхцөлийг бүрдүүлэх зорилготой уг уулзалтад холбогдох газрын удирдлагууд, мэргэжилтнүүд илтгэл тавьж оролцлоо.



   Тухайлбал, НЗД бөгөөд Улаанбаатар хотын захирагч С.Батболд Нийслэлийн хөгжлийн дунд хугацааны бодлого, 2017 онд хэрэгжүүлэх хөрөнгө оруулалт, бүтээн байгуулалтын ажлуудыг танилцуулсан юм. Түүнчлэн Улаанбаатар хотын хөгжлийн корпорацийн гүйцэтгэх захирлын үүрэг гүйцэтгэгч Э.Сод-Эрдэнэ Улаанбаатар хотын хөгжлийн төслүүдэд хувийн хэвшлийн оролцоог бий болгох чиглэлээр, Гэр хорооллын дэд бүтцийн газрын дарга М.Ганбаатар гэр хорооллын хөгжлийн үзэл баримтлалын хүрээнд хийгдэх “Сервис Центр” төслийн талаар илтгэл тавьж, танилцуулаг хийлээ.

   Жил тутам зохион байгуулагддаг чуулганы энэ удаагийн уулзалтад УИХ болон Засгийн газрын гишүүд, Монгол улсад суугаа Онц бөгөөд Бүрэн эрхт Элчин сайд нар, нийслэлийн ИТХ-ын төлөөлөгчид, бизнес эрхлэгчид, хөрөнгө оруулагчид гээд олон талын төлөөллийг оролцуулж буйгаараа онцлогтой аж. 



НЗД бөгөөд Улаанбаатар хотын захирагч С.Батболд, Улаанбаатар хотын өмнө тулгамдаж буй, шийдвэрлэх ёстой олон асуудал бий. Эдгээрийг зөвхөн Улсын болон нийслэлийн төсвийн хөрөнгө оруулалтаар шийдэх боломжгүй. Мөн хотын хөгжилд хувийн хэвшлийнхний оролцоо маш чухал учраас тэднийг дэмжих зайлшгүй шаардлагатай байна. Бизнес эрхлэгчид, гадна дотны хөрөнгө оруулагчдаа дэмжих нь өнөөдрийн “Улаанбаатар – Хөрөнгө оруулалт 2017” бизнес чуулга уулзалтын гол зорилго нь юм.

Тиймээс төрийн зүгээс энэ тал дээр ямар бодлого баримталж, хэрхэн нээлттэй, ил тод ажиллах, ямар дэмжлэг үзүүлэхээ тодорхойлох нь чухал. Хөрөнгө оруулагчид, бизнес эрхлэгчид хотын бүтээн байгуулалтад ямар хувь нэмэр оруулах хэрэгтэй байгаа талаар зөвлөлдөх гэж байна.

Мэдээж улс орны хэмжээнд санхүүгийн хүндрэл бэрхшээл тулгараад байгаа ч энэ жилийн хувьд нийслэл хотод хэрэгжүүлэх бүтээн байгуулалтын чиглэлээр 700 орчим тэрбум төгрөгийн ажил байгаа. Энэ бол чамлахааргүй их тоо юм. Өнөөдрийн чуулга уулзалтад нийслэлийн зүгээс баримталж буй бодлого, төлөвлөлтүүдийг танилцуулж байна. Тухайлбал, худалдан авах ажиллагааг хэрхэн ил тод, нээлттэй явуулах, хөрөнгө оруулалт-захиалагчийн хяналтаа хэрхэн тавих, тендерт оролцохдоо гаргадаг алдааг засч залруулах, гэрээний үүргийг хэрхэн биелүүлдэг гээд олон зүйл дээр мэдээлэл өгөхийг зорилоо.

Төрийн байгууллагуудын зүгээс гаргадаг хүнд суртлыг багасгаж, элдэв захирамж, тушаал шийдвэр, бизнесийн үйл ажиллагааг боомилдог асуудлуудыг шийдвэрлэж ажиллахад анхаарна. Мөн НЗДТГ-ын дэргэд байгуулагдсан Хөрөнгө оруулалтыг дэмжих зөвлөл нь бизнес эрхлэгчдэд саад болж буй асуудал, дүрэм журам, шийдвэрүүд, хүнд суртал аль шатанд илүү байгаа зэргийг илрүүлэн, шийдвэрлэхээр ажиллаж байгаа.

Хөрөнгө оруулалтын сайжруулахын тулд газрыг 15 жилээр эзэмшүүлэхээр болсон нь иргэд, бизнес эрхлэгчдэд нэлээд таатай нөхцөлийг бүрдүүлсэн явдал боллоо. Гурван жил болоод л байцаагчид шалгалтаар ирж, хяналт шалгалт хийдэг дарамт үгүй болж, тухайн газар дээрээ тогтвортойгоор, удаан хугацаанд үйл ажиллагаа явуулах, хөрөнгө оруулах нөхцөлийг нь бий болгож чадлаа. 



НЗД-ын Дэд бүтэц, гэр хорооллын асуудал хариуцсан орлогч П.Баярхүү, Дотоодын нөөц эх үүсвэрээр 174 тэрбум, гадаадын зээл тусламж, буцалтгүй тусламж зэргээр 300 гаруй тэрбум гээд нийт 600 орчим тэрбум төгрөгийн хөрөнгө оруулалтын ажлыг 2017 онд Улаанбаатар хотод хэрэгжүүлэх юм. Энэ хөрөнгө оруулалтыг боловсрол, нийгэм, хөдөлмөр эрхлэлт, ХАА, барилга, дэд бүтэц, гэр хороолол гээд бүхий л салбар руу чиглүүлнэ. Тэр дундаа нийт санхүүжилтийн 60 орчим хувийг гэр хороолол, дэд бүтцийн салбарт түлхүү оруулах бодлого баримталж байна.

Ингэхдээ, Улаанбаатар хотод дахин дулааны бага оврын станцууд барихаас илүүтэй газрын гүний дулаан ашиглахыг зорьж байна. Энэ чиглэлээр Барилга, хот байгуулалтын яам, Эрчим хүчний яам, Нийслэлийн удирдлагууд ажлын хэсэг байгуулаад, судалгаа шинжилгээний ажлаа эхлүүлээд байна. Унгар улсын Будапешт хотноо ажиллахдаа гуравхан ажилтантай нэг станц 350 мянган өрхийг газрын гүний дулаанаар хангаж байгаатай үзэж танилцсан. Энэ нь эдийн засгийн үр өгөөжийн хувьд асар их хэмнэлт авчрах боломжтой шийдэл юм.

Дээрх төсөл хөтөлбөрүүдээс хамгийн эхэнд Сонсголонгийн гүүр, Баянзүрхээс Налайх хүртэлх хурдны зам, Яармагаас Хөшигийн хөндийн нисэх буудал хүртэлх авто замуудын ажлыг хэрэгжүүлэх юм.