Калифорни мужийн Лос-Анжелес хотноо АНУ-ын хамгийн үнэтэй байшин 250 сая доллараар зарагдлаа.

   Нийт 12,000 м.кв талбайтай уг сууц нь унтлагын 12 өрөө, угаалгын 21 өрөөтэй аж. Түүнчлэн гал тогооны хэд хэдэн өрөөтэйгөөс гадна 25 м урттай усан бассейн, 40 хүний суудалтай кино танхим, спа, боулингийн заалтай юм байна. Дөрвөн давхар байшинд хүмүүсийг дээш гарах, доош буухад нь тав тухтай байлгах үүднээс тохилог цахилгаан шат суурилуулжээ.



   Тус байшингийн байрлах Бел Эйр дэх уулын орчимд алдартнууд, кино одод амьдрах дуртай. Энэ нь уулс, далай гээд хотын хамгийн үзэсгэлэнтэй газар учраас олон хүн энд л сууцтай болох гэж өндөр үнэ төлөхөөс ч буцдаггүй аж.

   Төслийг хэрэгжүүлэгч Брьюс Маковскигийн хэлснээр дэлхий дээр энэ байшинг худалдаж авах чадвартай 3,000 хүн л байгаа гэнэ. Гэвч Лос-Анжелест байх өндөр үнэтэй бусад олон байшингаас ялгарах онцлог энэ сууцанд бий. Дээд зэрэглэлийн тансаг тавилга, хэрэгсэл, тоног төхөөрөмжийг гар таталгүй суурилуулж өгсөн нь үнэ нь тэнгэрт хадах бас нэгэн шалтгаан болжээ.  



   Худалдан авагч нь Роллс-Ройс, Феррари, Бугатти гээд 30 сая долларын үнэ бүхий автомашинууд, мотоциклиуд худалдан авчээ. Мөн нэр хүндтэй дизайнерууд, зохион бүтээгчдийн урласан гэрийн тавилга, чимэглэл хэрэгслүүдээр дүүрэн ажээ.



   Байшингийн тусдаа байрлах хэсэгт амьдрангаа бүтэн цагаар ажилладаг 7 ажилтан бий. Маковски, “Байшинд зочлоод гарсан хүмүүс сэтгэгдлээ тэр даруй үгээр илэрхийлж ч чадахгүй тохиолдол цөөнгүй байсан. Энэ байшинд байгаа юм бүхэн таныг тэнгэрт буй мэт сэтгэгдэл төрүүлнэ” хэмээн ярьсан юм.
Тэрээр байшинг үнэлэн худалдсан 250 сая доллар бол өндөр үнэ биш хэмээн өгүүлсэн. Олон тэрбум доллараа банканд зүгээр л хадгалаад хараад суудаг хүмүүсээс илүү зоригтой, шийдэмгий хүмүүс л үүнийг худалдан авч чадна гэжээ.


 
   Байшингийн бас нэгэн чухал зүйл бол дээвэр дээрх нисдэг тэрэгний зогсоол юм. Одоогоор загвар болгон харуулахаар Америкийн 1980-аад оны телевизийн шоунд ашиглаж байсан хуучин нисдэг тэргийг түр байрлуулаад байгаа. Та 250 сая доллараар сууцыг худалдан авсан ч, нисдэг тэрэг ашиглах эрхээ тусад нь авах шаардлагатай болно шүү.