Эртний ногоон барилгын технологийг дахин ашиглана

Эртний ногоон барилгын технологийг дахин ашиглана

   Сүүлийн жилүүдэд Африкийн ядуу буурай бүс нутгуудад орон сууц, байшингийн хомсдол газар авч, шийдвэртэй арга хэмжээ авах шаардлага тулгараад байгаа ажээ. Олон жилийн турш иргэд бут мод бүхий сүрлэн дээвэр дор толгой хоргодож байгаа ч, байгаль цаг уурын өөрчлөлт болон ой мод устан үгүй болж буйтай холбоотойгоор одоогийн энэ болхи сууц нь удаан үргэлжлэх боломжгүй болоод байна.

   Харин төмөр хавтанг байшин сууцанд хэрэглэхэд амар байдаг ч хэт өндөр үнэтэй байдгаас боломжтой цөөн тооны айл л ашигладаг аж. Тиймээс “Nubia Vault Association”-оос хуучны барилгын материал буюу шавар тоосгоны технологийг дахин ашиглахаар шийджээ.

   2000 онд Буркина Фасо дахь фермер Сери Ёолоу, Францын иргэн Томас Граниер энэхүү холбоог үүсгэн байгуулсан байна. Тэд Нубиагийн нуман агуй хэмээн нэрлэсэн технологи буюу шавар тоосгоор барьсан нуман дээвэртэй бат бөх сууцны барилгын ажлын явц нь олон зууны өмнөх эртний Египетийн үеийн технологитой тун төстэй юм. Өөрөөр хэлбэл, шороо, усыг холин зуурсныгаа наранд хатааж буй технологи нь адилхан гэсэн үг.



   Ийм нуман хэлбэртэй дээвэр бүхий сууцны ашиглалтын хугацаа нь дор хаяж 50 жил үргэлжлэх бөгөөд илүү сайн хийж чадвал хугацааг уртасгах ч боломжтой аж. Эдгээр нь төмөр, модон хийцтэй материалыг бодвол илүү хямд өртөгтэй бөгөөд хүйтэнд дулаан, халуунд сэрүүн байлгаж чаддагаараа онцлогтой.

  Тус холбоо нь орон нутгийн дагалдан ажилчдыг ажиллуулж, Баруун Африкийн тосгодын иргэдийг дэмжих бодлоготой байгаа аж. Мөн Нубиагийн зах зээлийг дэмжсэнээр эдийн засагтаа 22 сая долларыг эргэлдүүлэх боломжтой юм байна. Тэд 380 чулуучин, олон зуун тооны дагалдан ажилчдыг ажиллуулах юм.



   Холбооныхон Буркина Фасо, Гана, Мали, Сенегалд 1800 гаруй хүнд сууцаа барихад нь дэмжлэг үзүүлжээ. Нубиагийн нуман дээвэрт сууц нь 1000 орчим долларын өртөгтэй бөгөөд иргэд өөрсдөө шавар тоосго хийж, зардлаа багасгах боломжтой юм байна. Энэ нь иргэдийн сууцжуулаад зогсохгүй, эдийн засгийн хөгжилд ч хувь нэмэр болж, хүрээлэн буй орчинд сөрөг нөлөөгүй гэдгээрээ давуу талтай. 

Холбоотой мэдээ