Эсгий хотоос их хот хүртэлх түүхэн хөгжлийн ойн баяр буюу Монгол улсад орчин цагийн барилгын салбар үүсч хөгжсөний 90 жилийн ойн баяр тохиож буй энэ цаг үед “Барилга Эм Эн” ХХК сагсан бөмбөгийн аварга шалгаруулах тэмцээнээ уламжлал ёсоор зохион байгуулж байна. МҮЭСТО-ны Спорт зааланд өнөөдөр албан ёсоор нээлтээ хийсэн “Barilga Basketball 2016” тэмцээнийг Барилгын Хөгжлийн Төв, Монголын Барилгын Үндэсний Ассоциаци, Монголын Барилгын Инженерүүдийн холбоо, Монголын Барилгын Материал Үйлдвэрлэгчдийн холбоо хамтран зохион байгуулж, салбарын аж ахуйн нэгжүүд, төрийн болон төрийн бус мэргэжлийн холбоодын сагсан бөмбөгийн багууд тэмцээнд оролцож байна.

     Нээлтийн ёслолын ажиллагаанд “Барилга Эм Эн” ХХК-ийн захирал Г.Батсүх, “Барилга.МН” сэтгүүлийн эрхлэгч Ч.Баатарсүрэн, БХТ-ийн захирал Б.Баярсайхан, дэд захирал Ч.Отгончулуун, МБҮА-ийн дэд ерөнхийлөгч Ц.Эрдэнэчулуун, МБИХ-ны Үйл ажиллагаа, хөгжлийн албаны менежер Х.Хонгорзул, МБМҮХ-ны Сургалт хариуцсан менежер Хишигжаргал нар оролцож, багуудад амжилт хүсч, тэдний хамт Төрийн сүлд дуулал эгшиглүүлсэн юм.

     Хоёр өдрийн турш үргэлжлэх “Barilga Basketball 2016” сагсан бөмбөгийн тэмцээнд “БҮТИ”, “Альянс-Тех”, “Жигүүр Гранд”, “Монкон Констракшн”, “Номин Констракшн”, “Хурд Групп”, “ҮББК”, “БХТ”, “Заг” зэрэг барилгын салбарын компани, байгууллагууд өргөнөөр оролцож байна. Ингээд тэмцээнд оролцогч бүх багууддаа амжилт хүсье.