БХБ-ын сайд МБҮАссоциацийнхантай өглөөний уулзалт хийлээ
Үүрэгт ажлаа хүлээн аваад удаагүй байгаа ч, ажилдаа шуурхайлан орсон Барилга, хот байгуулалтын сайд Г.Мөнхбаяр Монголын Барилгын Үндэсний Ассоциацийн удирдлагууд болон гишүүдийн төлөөллүүдтэй ажил хэрэгч өглөөний уулзалт хийлээ.
Шинэхэн сайд барилгын салбарынхаа аж ахуйн нэгж байгууллагуудтай хурлын ширээний ард суугаад ярилцахаас илүүтэй өглөөний цай уунгаа санал бодлоо чөлөөтэй солилцох зорилгоор энэхүү уулзалтыг хийсэн байна.
Тус ассоциациас гишүүдээ төлөөлж, Ерөнхийлөгч Д.Цэрэнжигмэд, дэд ерөнхийлөгч С.Нямдаваа, гүйцэтгэх захирал Б.Нэмэхбаатар болон “Бүти”, “Ультрасоник”, “Эрэлт Импекс”, “Эко коснтракшн”, “Заг групп”, “Бармон групп”, “Сан”, Цаст групп, “Барилга Эм Эн” зэрэг гишүүн байгууллагуудын төлөөлөл уулзалтад оролцож, БХБ-ын сайдад санал бодол, хүсэлтээ илэрхийлж, сонирхсон асуултуудаа тавьсан юм.
Тэдний асуултад хариулахын зэрэгцээ, үүрэгт ажлаа гүйцэтгэх дөрвөн жилийн хугацаанд эн тэргүүнд шийдвэрлэж, ажиллах шаардлагатай байгаа асуудлуудаа ч Сайд тэдэнд хэллээ.
Ингэхдээ,
- Ипотекийн зээлд 80-аас дээш м2 талбайтай орон сууцнуудыг уян хатан нөхцөлтэйгөөр хамруулах,
- Барилгын салбарын компаниудад татварын уян хатан бодлого баримтлах,
- Сургалтын орчныг сайжруулж, мэргэжилтнүүдийн ур чадварыг нэмэгдүүлэх,
- Тусгай зөвшөөрлүүдийг замбараагүй олголтыг цэгцлэх, шийдвэрлэх,
- Барилгын салбарын хууль эрхзүйн орчныг сайжруулах,
- Барилгын салбарт ажиллагсдын нийгмийн асуудал, орон байрны асуудлыг шийдвэрлэдэг болох орчин нөхцөлийг бүрдүүлэх,
- Салбарын бизнес эрхлэгч, захиалагч, гүйцэтгэгч компаниудын зээлийн хугацаа болон зээлийн хүүгийн асуудал зэргийг шийдвэрлэх гарц, боломж нөхцөлийг судлан арга хэмжээ авч ажиллана гэдгээ мэдэгдсэн юм.
Мөн сайд цааш нь хэлэхдээ, Барилга хот байгуулалтын яамыг удирдан ажиллах үүрэгт ажлынхаа хугацаанд салбарын ажилтан, албан хаагчдын хөдөлмөрийн аюулгүй байдал, аюулгүй ажиллагаа, эрүүл ахуйг сайтар хангах тал дээр шийдвэртэй алхмуудыг хийж, хатуу арга хэмжээ авч ажиллана гэдгээ онцлон тэмдэглэлээ.
Өнөөдрийн уулзалтын талаар МБҮА-ийн гүйцэтгэх захирал Б.Нэмэхбаатараас тодруулахад,
"Өмнө нь Хотын даргаар ажиллаж байсан, Орон сууц нийтийн аж ахуйн салбарт олон жил ажилласан туршлагатай хүн БХБ-ын Сайдаар томилогдсон явдалд баяртай байна. Сайд Г.Мөнхбаяр өнөөдөр манай ассоциацийн Удирдах зөвлөлийн гишүүдтэй уулзаж ярилцлаа. МБҮА-ийн Удирдах зөвлөлд Монголын барилгын салбарын томоохон 20 гаруй компанийн удирдлагууд багтдаг.
Өнөөдөр бид барилгын салбарын тулгамдсан асуудлууд, орон сууцны моргейжийн асуудал, үнэ, норм стандарт, хууль эрхзүйн шинэчлэл зэрэг сэдвээр ярилцаж, өглөөний цайтай ажил хэрэгч уулзалтыг зохион байгууллаа. Уулзалтаар цаашид энэ салбарт хийж хэрэгжүүлэх ажлын талаар санал бодлоо солилцож, идэвхтэй хамтран ажиллах талаар тохиролцолд хүрлээ. Салбарын бодлогыг төрийн бодлогод тусгуулах, зөв засаглалыг бий болгох чиглэлээр идэвхтэй хамтарч, сар болгон ажил хэрэгч уулзалт хийе гэж тохиролцлоо" гэсэн юм.
Түүнчлэн уулзалтад “Барилга Эм Эн” ХХК-ийн Ерөнхий захирал Г.Батсүх “Барилга, үл хөдлөх хөрөнгийн судалгааны тайлан 2016”-д багтсан барилгын салбарын хөрөнгө оруулалт, эрэлт нийлүүлэлт, тусгай зөвшөөрөлтэй аж ахуйн нэгжүүд, ажиллах хүчний талаар товч танилцуулга хийж, Сайдын сонирхсон асуултуудад хариулт өгсөн юм.