15 настай сургуулийн сурагч охин далайн урсгалаас эрчим хүч гарган авах хямд төхөөрөмж бүтээжээ. Түүний энэ нээлт Залуу эрдэмтдийн шагналыг хүртэж, 25,000 ам.доллараар шагнуулсан байна. Охины бүтээсэн энэхүү анхны загвар нь далайн түрлэгээс хэрэглээний эрчим хүчийг гарган  авах төхөөрөмж бөгөөд үүнийг хийхэд ердөө 12 долларын өртөгтэй аж. Ханна Хербст уг хямд өртөгтэй төхөөрөмжийг цахилгааны хомсдолтой, хүртээмж багатай хөгжиж буй орнуудад зориулан санаачилжээ.

     Флоридад амьдардаг бяцхан эрдэмтэн охин захидлаар харилцдаг найзынхаа амьдардаг Этиоп зэрэг буурай хөгжилтэй орнуудад зориулан ийнхүү хамгийн хямд үнэтэй цахилгаан үүсгүүр төхөөрөмжийг бүтээхийг хүссэн байна. Учир нь түүний найз өөрийн оронд эрчим хүчний гачаал ямар байдаг тухай олон зүйлийг захидалдаа бичдэг байжээ.



     Ханна Хербст 3D хэвлэмэл сэнс, жижиг дамар болон усан цахилгаан үүсгүүр бүхий хөвөгч төхөөрөмжийг хийсэн аж. Энэ нь далайн түлхэлт, урсгалыг хэрэглээний эрчим хүч болгох боломжтой гэнэ. Энэ нь цахилгаан шугам сүлжээний хүчин чадлыг гүйцэхгүй ч, үүсгэсэн эрчим хүч нь  далайн усыг ундын ус болгодог цэвэршүүлэгч машин гэх мэт төхөөрөмжийг ажиллуулахад хангалттай хүрэлцэх аж. Хербстийн уг нээлт бусад 9 сурагчийн бүтээлтэй өрсөлджээ.