Өнөөдөр Санхүүгийн зохицуулах хороо, “Монголын ипотекийн корпораци” ОССК, Монголбанк болон Нийгмийн хамгаалал хөдөлмөрийн яам гэсэн дөрвөн байгууллага хамтран, орон сууцны хөрөнгөөр баталгаажсан үнэт цаасны талаар мэдэгдэл хийж, харилцан танилцуулга хийлээ.

     Энэ оны хоёрдугаар улирлын байдлаар Санхүүгийн зохицуулах хороо нийт 52,535 зээлдэгчийн орон сууцны зээлийн хөрөнгөөр баталгаажсан 2,5 их наяд төгрөгийн үнэт цаасыг бүртгэжээ. “МИК” ОССК-иас гаргаж буй энэхүү баталгаат үнэт цаасыг хаалттай хүрээнд арилжаалж, давуу эрхийн буюу 90 хувийг нь Монголбанк, энгийн буюу 10 хувийг нь орон сууцны зээлийн багц худалдсан арилжааны банкууд худалдан авсан байна.

     “МИК” ОССК нь одоогоор орон сууцны зээлийг 9 удаагийн гаргалтаар үнэт цаасжуулж, ипотекийн зээлийн нийт 217,2 тэрбум төгрөгийн төлбөр төлөгдсөн байна.

“МИК” ОССК-ийн гүйцэтгэх захирал Д.Гантөгс,



- Ипотекийн зээлийн нөхцөл байдал өнөөдрийн байдлаар ямар байгаа вэ? Зээл нь бүтсэн ч, санхүүжилтээ авч чадахгүй олон иргэд байна. Энэ тал дээр?

- Ипотекийн зээлийн хөтөлбөр хэрэгжиж эхлээд гурав дахь жилдээ үргэлжилж байна. Мөн засгийн газраас орон сууцны 5 хувийн зээлийг гаргахаар төлөвлөж, 2016 оны 3-р сард шийдвэр гарган хэрэгжүүлж эхэлсэн. Сонгуулийн жилтэй холбогдуулаад энэ хөтөлбөр цаашид үргэлжлэх эсэхийг олон нийтийн зүгээс ихээхэн сонирхож байсан. Хэвлэл мэдээллийн хэрэгслээр ч олон талын байр суурийг илэрхийлж байгаа. Энэ хөтөлбөрийг зарим нь шүүмжилдэг ч, цаашид үргэлжлээсэй гэж хүсэх хүмүүс ч бий.

МИК өнөөдөр Санхүүгийн зохицуулах хороотой хамтраад энэ хөтөлбөрт оролцож буй бүх талуудыг урьж, үндсэн хэрэгжилтийн явцыг танилцуулахаар шийдсэн. Бидний зүгээс ипотекийн хөтөлбөрийг харьцангуй маш сайн хэрэгжиж байгаа гэж дүгнэж байна. Гурван жилийн хугацаанд 85,000 орчим айл өрх ипотекийн 8 болон 5 хувийн зээлээр байртай болжээ.

Монголбанк, засгийн газартай хамтран хэрэгжүүлсэн уг хөтөлбөрийн хүрээнд 3.8 их наяд төгрөгийн зээл зах зээлд бүрэлдсэн нь асар их хөрөнгө юм. Ямартай ч шинэ засгийн газар бүрдэн ажиллаж байгаа энэ үед иргэдэд зөв мэдээлэл өгөх нь зүйтэй гэж үзлээ.

- Зээлийн дараагийн эх үүсвэрийг хаанаас гаргах вэ?

- Дараагийн эх үүсвэрийг эхний ээлжинд иргэдэд олгосон 3.8 их наяд төгрөгийн зээлийн эргэн төлөлтөөс санхүүжүүлнэ. Үүнтэй холбоотойгоор энэ оны хавар Ирээдүйн тэтгэврийн нөөц сангийн тухай хууль батлагдсан. Нөөц санг удирдах, захиран зарцуулах, хэрэгжилтэд нь хяналт тавих үүргийг Улсын нийгмийн даатгалын ерөнхий газарт харъяалуулсан.

- Эргэн төлөлт сайтай байгаа зарим өрхийн зээлийг худалдаж аваад үнэт цаасны зах зээл дээр борлуулна гэсэн мэдээллийн тухайд?

- Манай үйл ажиллагаа хэвийн үргэлжилж байна. Өнгөрсөн хугацаанд Санхүүгийн зохицуулах хорооноос зохих зөвшөөрлийг авч, хуулийн дагуу тусгай зориулалттай 9 компанийг байгуулж, 2.4 их наяд төгрөгийн үнэт цаасыг зах зээл дээр гаргасан. Үнэт цаасны шинж чанар хэвээр байгаа. Энэ нь эхний ээлжинд 20 жилийн хугацаатай, давуу эрхтэй ипотекийн зээлээр баталгаажсан бондын хүү 4.5 хувьтай хэвээр байгаа. Энгийн эрхтэй буюу эрсдэлтэй хэсгийн үнэт цаасны хүүгийн хувь хэмжээ 10.5 хувьтай байна. Тус хөтөлбөрт нийт 51,000 айлын үнэт цаас хамрагдсан. Мөн арилжааны банкууд дээр 200 орчим тэрбум төгрөгийн орон сууцны зээлүүд үнэт цаасны хөтөлбөрт хамрагдахаар хүлээгдэж байна.

- Зээлийн эргэн төлөлт ямар байгаа вэ?

-  МИК-иас өдөр бүр хяналт тавин ажиллаж байгаа. 2013 оны 6-р сараас хойш ипотекийн зээлийн эргэн төлөлт 99,9 хувьтай байна. Өөрөөр хэлбэл, ипотекийн бүх зээл хэвийн төлөгдөж байгаа. Бусад төрлийн зээлтэй харьцуулахад харьцангуй м аш сайн үзүүлэлт юм. Үүнээс 0.5 орчим хувь нь чанаргүй зээл болсон. Зээлээ эргэн төлж чадахгүй байгаа айл өрхүүдтэй бид хэлэлцэж, боломжтой арга замыг нь судалж байна.

- Одоогийн эргэн төлөлтийн хувь хэмжээ хэр байгаа вэ? Дараагийн ээлжийг санхүүжүүлж хүрэх үү?

- Бондын төлбөрт УНДЕГазар руу шилжсэн дүнгээр нь тооцвол 2014 оны 3 сараас хойш 400 орчим тэрбум төгрөг зээлийн хүү болон үндсэн төлбөрт бүрэлдсэн. Эдгээр нь эргээд шинээр зээлд хамрагдах гэж байгаа хүмүүст олгогдоод явж байна.