Өнөөдөр ШУТИС-ийн Барилга Архетиктурын Сургуулийн 10 оюутанд БНСУ-ын "Ezcon" ХХК тэтгэлэг олголоо. Тус арга хэмжээнд компанийн ерөнхий захирал Ким Сог Гюн, Монгол дахь салбар хариуцсан захирал Ким Дэ Шиг болон ШУТИС, БАС-ийн захирал Э.Нинжгарав, тэнхимийн эрхлэгч, багш нар, тэтгэлэгт хамрагдсан оюутнууд оролцсон юм.

Тус компани нь бетон зуурмагийн үйлдвэрт үйл ажиллагаагаа явуулдаг бөгөөд Монголд салбараа нээснээс хойш 6 дахь жилдээ ар гэрийн боломж тааруу, сурлагын дүн сайн оюутнуудыг сонгон тэтгэлэг олгодог аж. Өмнөх жилүүдэд 4-5 оюутныг сонгон 100 хувийн тэтгэлэг олгосоор ирсэн байна. Энэ жилийн тухайд илүү олон оюутныг хамруулах зорилгоор 10 оюутанд сургалтын төлбөрийн 50 хувийн тэтгэлэг олгохоор болжээ. Одоогийн байдлаар нийт 36 оюутныг тэтгэлэгт хамрагдуулаад байна. Цаашдаа ч мөн илүү олон оюутан хамруулах хүсэлтэй байгаагаа тус компанийн төлөөллүүд илэрхийлж байлаа.