Барилга хот байгуулалтын сайд З.Баянсэлэнгэ салбарын төрийн бус байгууллагуудын төлөөлөл, удирдлагуудтай уулзаж, тэдний санал бодлыг хуваалцлаа. Барилгын салбарт магадлал, экспедиц хийдэг, зөвлөх үйлчилгээ үзүүлдэг гээд хэд хэдэн байгууллагын төлөөлөл, Барилгын тухай хуулийн шинэчилсэн найруулгын төсөлд санал тусгах зүйлс байсан ч хэдийнэ өргөн барьчихсан байгааг хэлсэн юм. Түүнчлэн барилгын норм дүрмийн орчуулга, хөрсөн дээр буулгах ажил шаардлага хангахгүй байгаагаас залуу инженерүүдэд ойлгомжгүй, ашиглахад түвэгтэй байдагт шүүмжлэлтэй хандаж байгаагаа тэд ярилаа. Байгаль орчинд ээлтэй, ногоон барилгын тухай асуудал, сэргээгдэх эрчим хүчийг өргөн хүрээнд ашиглах, нэвтрүүлэх тал дээр манай улс дэлхийн бусад орнуудаас хоцрогдож байгаа, салбарын яамны зүгээс энэ чиглэлээр бодлогодоо тусган анхаарал хандуулахгүй байна гэх шүүмжийг төлөөллүүд хэлж байлаа.

     Дараагийн яригдсан чухал сэдэв нь төрийн бус байгууллагад төрийн байгууллагын зарим чиг үүргийг шилжүүлэх тухай яриа байсан юм. Энэ ажлыг маш системтэй хэрэгжүүлэх шаардлагатай гэдгийг хаа хаанаа анхаарах хэрэгтэйг дурдлаа. Мөн төсвийн жилийг өөрчлөх тухай санал оруулах хүсэлтийг УИХ-ын гишүүнийх нь хувьд цааш нь уламжилж өгөхийг сайдаас хүссэн юм. Тухайлбал, барилгын, замын тендерийн асуудлыг шийдвэрлэхдээ төрийн байгууллагууд шат дараалан дамжуулж, цаг алдан наадам өнгөрөөдөг, харин наадмаас хойших багахан хугацаанд тухайн ажлыг гүйцэтгэхэд цаг хугацаа давчуу, хичээлийн шинэ жил эхэлж хөдөлгөөн ихсэх, түүнээс болоод ажил чанаргүй болох, төлөвлөгөөт хугацаандаа дуусахгүй байх гээд олон талын хүндрэл учирдаг тухай тэд мэдэгдлээ. Харин төрийн байгууллагууд хугацаа алдахгүйгээр асуудлыг шийдвэрлэдэг болчихвол ажил чанартай гүйцэтгэхэд чухал нөлөө үзүүлнэ гэдгийг онцолсон. Төрийн бус байгууллагуудын удирдлагуудын зүгээс тавьсан дараагийн нэг чухал санал нь сургалтын тухай асуудал байлаа. Тэдний зүгээс нас харгалзахгүйгээр олон жилийн ажлын туршлага, мэдлэгээсээ залуу үетэйгээ хуваалцах тогтмол сургалт явуулж байх хүсэлтийг тавьсан юм.

     Нөгөө талаас эдгээр төлөөллүүд Барилгын хөгжлийн төвийн үйл ажиллагаанд шүүмжлэлтэй хандаж, тус байгууллагын эрх мэдэл, хүнд суртал нь хэтэрч байгаад дургүйцэж буйгаа илэрхийлжээ.

     Харин сайдын зүгээс, гурван жилийн турш гацсан хуулийн шинэчилсэн найруулгын төслийг өргөн барих ажлыг түргэвчлэх тал дээр анхаарч, төслийг байнгын хороодын хуралдааны явцад засч сайжруулахаар төлөвлөж буйгаа мэдэгдлээ. Ирэх онд Төрийн өмчийн хороо татан буугдаж, төрийн өмчит үйлдвэрийн газрууд салбар яамд дээр төвлөрөх учраас Барилгын хөгжлийн төв БХБ-ын харъяанд ирнэ гэдэг тайлбарыг З.Баянсэлэнгэ сайд өгсөн юм.

     Харин яамны зарим чиг үүрэг, тусгай зөвшөөрөл олгох эрхийг мэргэжлийн ТББ-ынханд шилжүүлэх тал дээр ямар нэг эрх ашгийн сонирхлын зөрчил гаргахгүй байх, сонгон шалгаруулалтыг хийхдээ бүх байгууллага, төлөөллийг оролцуулж, нэг талын мэдээлэлд тулгуурлан хазайхгүй байх, тэнцвэртэй шийдвэр гаргахад анхаарч ажиллана гэдгээ сайд онцоллоо. Салбарын сайдаар ажиллаж байгаа энэ богино хугацаанд, Барилга хот байгуулалтын яамыг аж ахуйн үйл ажиллагаанаас салгаж, бодлогын асуудлуудыг шийдвэрлэх, ТББ-ын төлөөллүүдийн тавьсан санал хүсэлтийг бүрэн шийдвэрлэж чадахгүй ч, эхлэлийг нь тавьж, цаашид үр дүнтэй шийдвэр гаргуулах тал дээр анхаарч ажиллахаа тэрээр мэдэгдсэн юм.