Яамдын сайд нарыг огцруулснаас хойш даруй сар гаруй хугацаа өнгөрлөө. Харин МУ-ын Ерөнхий сайд Ч.Сайханбилэг засгийн газрын гишүүд, шинэ сайд нарыг томилох асуудлыг наашлуулж, өнгөрөгч Баасан гаригт нэрсийг УИХ-ын дэд даргад өргөн барьсан юм. Ерөнхий сайдын өргөн барьсан, Монгол Улсын шадар сайдад УИХ-ын гишүүн Ц.Оюунбаатар, Байгаль орчин, Ногоон хөгжил, Аялал жуулчлалын сайдад УИХ-ын гишүүн Н.Батцэрэг, Сангийн сайдад УИХ-ын гишүүн Б.Болор, Барилга, Хот Байгуулалтын сайдад УИХ-ын гишүүн З.Баянсэлэнгэ, Зам тээврийн сайдад УИХ-ын гишүүн М.Зоригт, Хөдөлмөрийн сайдад УИХ-ын гишүүн Г.Баярсайхан нарыг томилуулах саналыг Улсын Их Хурал нээлтээ хийсэн ээлжит бус чуулганаар хэлэлцэх юм.

        Монгол Улсын Засгийн газрын тухай хуулийн 21 дүгээр зүйлийн 2 дахь хэсэгт зааснаар Засгийн газрын гишүүн албан тушаалаас огцорч, орон гарсан тохиолдолд Улсын Их Хурал 30 хоногийн дотор түүнийг нөхөн томилох зохицуулалттай аж. Засгийн газрын зарим гишүүдийг томилох асуудлыг хэлэлцэх энэхүү ээлжит бус чуулганыг энэ сарын 7-ноос 18-ны өдрүүдэд хуралдуулна.

      Сайд нарыг томилох асуудлыг УИХ дахь намын бүлгүүд, байнгын хороодын хуралдаанаар, дараа нь чуулганаар хэлэлцэх юм. Өнөөдөр 14 цагийн байдлаар АН-ын бүлгийн гишүүд засгийн газрын гишүүдэд хэлэлцэгдэж байгаа бүх нэрсийг дэмжсэн тухай албан бус эх сурвалж мэдэгдлээ.

      Засгийн газрын гишүүдийг томилох уг асуудал нь барилгын салбарынхны хувьд ч багагүй хүлээлт үүсгэж байгаа. Тус салбарын төрийн дээд шатны байгууллага болох Барилга, Хот Байгуулалтын сайдад томилогдохоор нэр нь хэлэлцэгдэж байгаа З.Баянсэлэнгэ гишүүн нь 1994 онд Дархан хотын АУДунд сургуулийг бага эмч мэргэжлээр, 2003 онд Цагдаагийн академийг эрх зүйч мэргэжлээр тус тус төгсөж байжээ. Тэрээр 1996-1999 онд НЦГУТ-д бага эмч, 2003 онд Сүхбаатар аймгийн Цагдаагийн хэлтэст хэрэг бүртгэгч, 2003-2006 онд Баянзүрх дүүргийн Цагдаагийн хэлтэст хэрэг бүртгэгч, 2007-2008 онд Хэрэглэгчдийн эрх ашгийг хамгаалах нийгэмлэгт арбитрч, 2008-2009 онд Чингэлтэй дүүргийн 17-р хорооны Засаг даргаар ажиллаж байжээ.