Монголд Ногоон барилга баригдах үндэс тавигдлаа

Монголд Ногоон барилга баригдах үндэс тавигдлаа

      Европын холбоо, Чехийн Хөгжлийн агентлагийн санхүүжилтээр Каритас Чех олон улсын байгууллага Монгол улсад “Байгаль орчинд ээлтэй, эрчим хүчний хэмнэлттэй барилгын үйлдвэрлэлийг дэмжих” төслийг 2012-2016 оны хооронд хэрэгжүүлж байна. Энэхүү төслийн хүрээнд Монгол Улсын барилгын мэргэжилтнүүд бэлтгэдэг сургуулиудад зориулан “Ногоон барилга” сурах бичгийг боловсруулан, өнөөдөр ШУТИС-ийн Барилга, архетиктурын сургуульд шинэ номын нээлтээ хийж, бэлэглэсэн юм. Түүнчлэн дээрх сургуулийн хичээлийн хөтөлбөрт “Ногоон барилга” хичээлийг албан ёсоор оруулж, аль ч мэргэжлийн оюутан сонгон суралцах боломжийг олгожээ. Номын зохиогчоор ШУТИС-ийн багш нар оролцсон аж. Мөн дэлхийн шилдэг сургуулиудад ашиглаж буй 2500 еврогийн үнэ бүхий 20 гаруй нэр төрлийн ном, гарын авлагыг гардууллаа.
       Каритас Чех ОУБ-ын Монгол дахь суурин төлөөлөгч Тибо Шапуа хэлэхдээ, Барилгын салбараас байгаль орчинд үзүүлэх хор нөлөөг багасгахын тулд энэ чиглэлийн ирээдүйн боловсон хүчинг бэлтгэх нь чухал юм. Гарын авлага маань байгаль орчинд ээлтэй, тогтвортой үйлдвэрлэлийг хэрхэн бий болгох талаар өгүүлсэн. “Ногоон барилга” хичээлийг олон оюутан сонгосон гэж сонссон. Эдгээр оюутнууддаа маш их баярлалаа.
   ШУТИС-ийн Барилга, анхетиктурын сургуулийн захирал Э.Нинжгарав, Юуны өмнө өнөөдрийн үйл ажиллагаанд хүрэлцэн ирсэн танай хамт олонд баярлалаа. Манай сургууль Каритас Чех ОУБ-тай жилийн өмнөөс хамтран ажиллаж байна. Өнөөдөр “Ногоон барилга” номын болоод “Ногоон барилга” хичээллийн нээлтийн үйл ажиллагаа болж байна. Энэ хичээлийг сонгон судалсанаар барилгаас үүдэлтэй хог хаягдлыг хэрхэн боловсруулах, архетиктурын хэмжээнд ногоон барилгыг хэрхэн төлөвлөх, орчноо хэрхэн тохижуулах, эрчим хүч, ус дулаан, барилгын материалыг байгаль орчинд ээлтэйгээр хэрхэн боловсруулах зэрэг өргөн ойлголт өгөх юм. Тус хичээлийг Хүрээлэн байгаа орчны инженер, Төлөвлөлт зохион байгуулалт, Архетиктур, Барилгын бүтэц эдлэлийн багш нар заана. Нийт 3 кредиттэй хичээл юм. Үүнээс гадна Каритас Чех байгууллагатай хамтран олон ажлыг хийхээр төлөвлөж байна. Тухайлбал, Европын холбооны улсад барилгын хог хаягдлыг хэрхэн боловсруулах, түүний менежментийн талаар төсөл бичиж өгөөд тодорхой шалгаруулалтын үйл  ажиллагаа нь явагдаж байна.
Каритас Чех олон улсын байгууллага нь ШУТИС-иас гадна Барилгын Политехникийн Коллеж, Техник Технологийн Дээд Сургууль болон бусад барилгын салбарын сургуульд “Ногоон барилга” хичээлийг албан ёсоор хичээлийн хөтөлбөрт нь тусгажээ.





Холбоотой мэдээ