Хүн ам, орон сууцны ээлжит тооллогыг 10 жил тутам, завсрын тооллогыг 5 жил тутамд зохион байгуулах тухай Монгол Улсын Статистикийн тухай хуулинд заасан байдаг. Тиймээс энэ жил Үндэсний Статистикийн хороо анх удаа “Хүн ам, орон сууцны 2015 оны завсрын тооллого”-ыг бүртгэлд суурилсан зохион байгуулалтаар хэрэгжүүлэхээр төлөвлөжээ. Төлөвлөгөөний дагуу бэлтгэл ажлын хүрээнд нийслэлийн бүх дүүрэг, хороодын засаг дарга, тэдгээрийн тооллогын комиссийн гишүүд, зохион байгуулагчид, гэрээт ажилтнууд гээд 600 хүнийг хамруулсан семинарыг зохион байгуулж байна.

     Энэ удаагийн завсрын тооллого нь хүн амын регистерийн бүртгэлд суурилсан бүртгэлийн аргаар явуулах гэж байгаагаараа онцлогтой. Энэ нь статистик мэдээллийг тодотгох, шинэчлэн сайжруулах, хүн амын өрхийн мэдээллийн санг баяжуулж, төрийн захиргааны болон салбарын төв байгууллагуудын холбогдох сангуудтай уялдуулах, мөн хүн ам орон сууцны 2020 оны ээлжит тооллогыг явуулах суурь нөхцлийг бүрдүүлэх зорилготой юм байна.

     10 жил тутамд явуулдаг хүн ам, орон сууцны тооллогын завсрын хугацаанд төрөөс явуулж буй бодлого, үйл ажиллагаа, нийгэм эдийн засгийн цаашдын чиг хандлагыг тодорхойлоход өргөн хүрээний суурь мэдээллийн санг бий болгоход завсрын тооллогын ач холбогдол бий ажээ. Тиймээс зөвхөн хүн амын мэдээллийг бүрдүүлээд зогсохгүй, орон сууц, гэр хороолол зэрэг тэдний амьдрах орчин, амьжиргааны түвшин гэх мэт бусад хүчин зүйлсийг давхар судалж, нарийн тоо баримтыг гаргаж байгаа нь тооллогын бас нэгэн давуу тал юм.