“Hiroshi Nakamura & NAP” компанийн захирал Хироши Накамура энэхүү өвөрмөц туузан хэлбэртэй барилгыг хуримын бэлгэдэл болгон бүтээжээ. Тус барилгын туузан хана нь хоёр талаас нийлж, нэгэн цогц болон нэгдэж, салшгүй болж байгааг тэрээр ийнхүү бэлгэшээжээ. Түүний мушгиралдсан тахир шат нь мөн л гэрлэлтийн бас нэгэн бэлгэдэл болж байгаа аж. Хурим хийж буй шинэхэн бэр, хүргэн хоёр салангид тусдаа замаар, мушгирсан шатаар явж, байгууламжийн орой дээр уулзах онцгой мөчид зориулан архитекторын уран шийдлийг ийнхүү санаачлан хэрэгжүүлсэн байна.

     Уг байгууламж нь Сэто Инланд арал дээр байрлах амралт, зочид буудлын цогцолборын нэгээхэн хэсэг аж. Эргэн тойрон өтгөн шигүү ой модоор хүрээлэгдсэн тус байшин далай руу харсан байршилтай учир байгалийн сайханд хуримын ёслолоо хийх гэсэн хосуудын анхаарлыг ихээхэн татдаг гэнэ.