Баянзүрх дүүргийн 21 дүгээр хороо буюу Гачууртын 85 дугаар сургууль дээр дотуур байрны асуудлаар нээлттэй хэлэлцүүлэг өрнүүлсэн. Хэлэлцүүлэгт БСШУЯ, Хүүхдийн төлөө үндэсний газар, Нийслэлийн хүүхэд залуучуудын газар, Баянзүрх дүүргийн Тамгын газар болон НЛМ-Норвегийн тусламжийн байгууллага зэргийн төлөөлөл оролцов.

Хэлэлцүүлэг өрнүүлсэн 85 дугаар сургууль нь Баянзүрх дүүргийн ЕБС-иуд дундаас дотуур байртай ганц сургууль юм. Тус дотуур байранд Гачуурт тосгон орчимд амьдардаг малчин өрх мөн амжиргааны баталгаажих түвшингээс доогуур орлогтой айлын 100 орчим хүүхэд амьдардаг гэнэ. Тэдний хэлэлцсэн гол асуудал бол дотуур байрны засвар үйлчилгээ, тохижилт, хүүхдийн эрхийн асуудал байлаа. Тус дотуур байранд засвар үйлчилгээ хийсэн ч, нэмж тохижуулах хөрөнгө мөнгө шийдэгдээгүй аж.