Тайландын Naka Phuket уулын энгэрээс цухуйсан өвөрмөц байшин бүхий зуслангийн хорооллыг сүндэрлүүлжээ. Уулархаг бүс нутагт байрлах энэхүү зуслангийн зочид буудал, амралтын газарт зөвхөн уулын жим замаар явж хүрдэг аж. Тайландын архитектор Дуангрит Буннагийн загварыг нь зохион бүтээсэн тус цогцолбор нь чүдэнзний хайрцаг хэлбэртэй 10 гаруй байшингаас бүрддэг. Эдгээр байшин нь уулын налуу энгэрээс цухуйн харагдах бөгөөд шалнаас тааз хүртлээ том шилэн ханатай, авсаархан бөгөөд өвөрмөц хийц загвартайгаараа уран барилгачдын анхаарлыг ихээхэн татдаг гэнэ.

     Хувийн эрэг, дээвэр дээрх спа үйлчилгээ, дээд зэрэглэлийн зоогийн газар, олимпийн стандарттай том усан сан зэргийг багтаасан 94 нэгжээс уг цогцолбор бүрддэг. Байшин тус бүр нь далай руу харсан байх бөгөөд зочны өрөөний шал нь үнэ, чанараараа дээгүүрт тооцогддог тик модоор хийгджээ. Угаалгын өрөө болон зарим хэсгийн ханыг байгалийн чулуугаар хийсэн нь байшингийн бас нэгэн онцлог юм.