Тирана хот болон олон улсын шүүмжлэгчдийн зүгээс Албанийн нийслэл хотын өмнө хэсэгт орших Тирана нуурын эрэг дэх энэхүү төслийг өндрөөр үнэлжээ. Хотын өнгө үзэмжинд архитектурын өвөрмөц шийдлийг нэвтрүүлэхийн зэрэгцээ уг төсөл нь олон нийтэд зориулсан цэцэрлэгт хүрээлэн, ногоон байгууламж, худалдааны төв зэргийг цогцоор нь байгуулснаар хотын ерөнхий төлөвлөгөөнд нийцсэн, маш оновчтой бүтээн байгуулалт болсон гэдгийг салбарынхан нь онцолсон байна.

     Энэ нь өдгөө хотын хамгийн их ногоон байгууламжтай хэсэгт тооцогдох болжээ. Нуурын хойд хэсэгт 20 га газарт байрлах тус байгуулалтад цэцэрлэгт хүрээлэн, амралт чөлөөт цаг өнгөрүүлэх үйлчилгээний газруудыг байгуулсан аж. Налуу, босоо, хөндлөн гээд хайш яайш байрлуулсан хад чулуу мэт дизайны өвөрмөц шийдэлтэй уг байгууламжийг орон сууц, оффис, худалдаа үйлчилгээний төв гээд олон зориулалтаар төлөвлөн хэрэгжүүлжээ.



     Байгууламжийн эргэн тойрон шигүү мод бүхий ногоон байгууламжууд, түүнийг чимэх “Хөх үүл” хэмээн нэррийддэг хөх өнгийн цэцэгс алаглан байх нь оршин суугч болоод иргэдэд эко орчинд тав тухтай байх нөхцлийг бүрдүүлж байгаа юм.



     Энд 225,000 ам метр орон сууц, 60,000 ам метр оффис, 20,000 ам метр олон нийтийн зориулалттай барилга, 60,000 ам метр худалдаа үйлчилгээний хэсэг, 15,000 ам метр зочид буудал, 20,000 ам метр спортын цогцолборын талбайг байгуулжээ. Төслийг 2010 онд гүйцэтгэж эхэлсэн бөгөөд нийт 600 сая еврогийн хөрөнгө оруулалтыг төлөвлөсөн байна. Албанийн хувийн аж ахуйн нэгжүүд энэхүү төслийг захиалж, Испанийн Мадридад төвтэй “Ambito” төслийн менежментийн компани удирдан ажиллажээ.