Барилгын инженер гэдэг бүхэл бүтэн шинэ ертөнцийг бий болгох чадалтай энэ салбарын амин зүрх болсон мэргэжил. Тэгвэл энэхүү алдар нэрээр дуудуулж яваа нэгэн залуу эрхэмтэй хийсэн ярилцлагаа хүргэе.

-Юун түрүүнд уншигчдад өөрийнхөө тухай товчхон танилцуулна уу.

Төмөрбаатарын Мөнхжаргал гэдэг. 1982 онд Улаанбаатар хотноо төрсөн. Ерөнхий боловсролын Ирээдүй цогцолбор 86-р сургуулийг дүүргээд тухайн үеийн Техникийн Их Сургуулийг Инженер-Япон, Англи хэлний орчуулагчаар төгссөн. Үүний дараа СЭЗДС-д Санхүү-менежментийн чиглэлээр суралцсан. Ажлын гараагаа “Топика” компьютер борлуулалтын компаниас  эхлүүлсэн. Дараа нь Швейцарийн Хөгжлийн агентлагийн төсөл дээр ажиллах болсон. Харин “Материалимпэкс” компанид 2010 оноос хойш оператороор ажилд орж, өдгөө ТУЗ-ийн гишүүн, инженерээр ажиллаж байна. Одоо эхнэр хоёр хүүгийн хамт амьдардаг.

-Инженер-Орчуулагч мэргэжлийг хэрхэн сонгох болов?

Амьдралд илүү ойр, хэрэгцээтэй мэргэжил гэсэн үүднээс сонгосон. Барилгын салбарт ажиллаад зургаан жил болж байна. Манай байгууллагаас 1200 айлын орон сууц, 25 давхар зочид буудлын төслийг эхлүүлж байгаа. Энэхүү төсөл дээр инженерээр ажиллаж байна.

-Өөрийн бие оролцсон томоохон төслүүдээс дурдаач гэвэл.

“Туушин” зочид буудлын дотоод шиллэгээ, “Шинэ Монгол” бүрэн дунд сургуулийн шил, цонх, 100 айлын нүхэн болоод гүүрэн гарцын шиллэгээ зэргийн зураг төсөл гаргахаас авахуулаад бүх процессийг гардаж хийсэн.
 

Улаанбаатарт хичнээн олон барилга барьж байгаа ч, Японд манайхаас илүү шигүү барьдаг. Хоёр барилгын хооронд 2-5 метрийн зайтай байх жишээтэй. Гэхдээ замаа сайн шийдчихсэн улс. Манайх энэ журмаар л хот төлөвлөлтөө шийдчих хэрэгтэй.

 

-Инженер байна гэдэг хамгийн нэр хүндтэй, үүнийгээ дагаад хариуцлага өндөр мэргэжил. Энэ ажлыг хийхэд сайхан зүйл нь юу байна? Эргээд бэрхшээл нь юу байдаг вэ?

Ямар чиглэлийн инженер гэдгээсээ шалтгаалан үүрэг, хариуцлага нь харилцан адилгүй. Ерөнхий инженер бол төлөвлөлт, зургаа гаргадаг, түүнийг уншдаг, зургийнхаа дагуу ажлаа гүйцэтгэдэг, маш няхуур байхыг шаарддаг. Барилгын инженер хүн гэдэг хамгийн бага зардлаар хамгийн чанартай барилга барихад оршино. Бага зардлаар гэхээр л чанаргүй гэсэн ойлголт байдаг. Энэ нь огт тийм биш. Бид аль болох хямд зардлаар чанартай барилга барьж, түүнийгээ боломжийн үнээр иргэдэд худалдаалахыг хичээдэг. Бэрхшээл гэвэл цаг харгалзахгүй ажилладаг. Асуудал гарсан даруйд бэлэн байх шаардлага тулгардаг.
 

-“Материалимпэкс” компанийн тухайд, сүүлийн үеийн сонин сайхан юу байна?

Манай компани 2003 онд барилгын чиглэлээр “Материалимпэкс констракшн” ХХК-ийг байгуулаад 20 гаруй барилга барьж, ашиглалтад өгсөн байна. Анх 1957 онд барилгын материал хангамжийн чиглэлээр байгуулагдаад, 1999 онд хувьчлагдсан. Түүнээс хойш барилгын материалын худалдаа, барилга угсралт, тээвэр зуучлал, хүнсний бараа борлуулалт, вакум цонх хаалганы үйлдвэр, зэрэг 12 чиглэлээр үйл ажиллагаагаа явуулж байна. Одоо бол Австрали, Гонконгийн хөрөнгө оруулалттай 1200 айлын орон сууц, зочид буудал, сургууль, цэцэрлэгтэй том төсөл хэрэгжүүлж байна.

-Барилгыг шууд хараад энэ чанартай, чанаргүй гэдгийг тодорхойлох боломжтой юу?

Шууд тэгж хэлэх боломжгүй. Үзэмжтэй будсан байвал алдаа нь анзаарагдахгүй байх талтай. Барилгын үндсэн материал нь арматур, бетон зуурмаг, цонх байдаг. Сүүлийн үеийн барилга ихэвчлэн бүрэн цутгамал болж байна. Иргэд цутгамал барилга гэхээр л маш сайн, блокоор барьсан бол муу гэсэн ойлголттой болчихсон. Блокоор барьсан ч сайн талтай.

-Таны хэлэх дуртай үг?

“Баярлалаа”. Хүн болгон энэ үгийг байнга хэлж байх хэрэгтэй.

-Нууц биш бол таны ирээдүйн зорилго?

УИХ-д гаръя гэж бодоод байгаа ш дээ /инээв/. Цаашдаа улс эх орныхоо хөгжил хувь нэмэр болох үүднээс барилгаа аль болох шинэлэг, чанартай, үзэмж төгөлдөр барих юмсан л гэж зорьдог доо.

Улаанбаатарт хичнээн олон барилга барьж байгаа ч, Японд манайхаас илүү шигүү барьдаг. Хоёр барилгын хооронд 2-5 метрийн зайтай байх жишээтэй. Гэхдээ замаа сайн шийдчихсэн улс. Манайх энэ журмаар л хот төлөвлөлтөө шийдчих хэрэгтэй.

-Ярилцсанд баярлалаа.