АНУ-ын Колорадод Монгол гэрийн загварыг дуурайлган барьсан дугариг байшинд нэгэн хөгжмийн студи байрладаг. Нүүдэлчин монголчуудын эрт үеэс хэрэглэсээр ирсэн энэ гэрийг зөөвөрлөж тээвэрлэх, барьж угсрах, буулгахад маш хялбар, хөнгөн авсаархан, бат бөх чанаруудыг нь хадгалахыг хичээн энэхүү байшинг барьжээ. Энэ нь ойр ойрхон нүүж, хотоос хот дамжин ажиллаж, амьдардаг хүмүүст илүү тохиромжтой. Байшингийн дээвэрт дулаалгын хөөс, хананд нь шилэн хөвөн хийсэн учир маш дулаан. Монгол гэрээс санаа авч, үлгэрлэн хийсэн байгалийн гэрлийг сайтар тусгадаг давхар цонх /тооно/, жижиг хаалга нь дулаан алдалт багатай, бас нэгэн чухал үзүүлэлт юм. Энэ гэр байшинг хэд хэдэн төрлийн загвар, хэмжээгээр барьж, дэлхийн аль ч бүс нутагт ашиглах боломжтой. 12-16 ханатай уг байшингийн өртөг нь 16,000-20,000 ам.доллар болно. Оршин суугч нь байшинг цахилгаан, сантехникийн шугамд холбуулах зэргээр өөрийн хүссэнээр өөрчлөн ашиглаж болно. Мөн нарны эрчим хүч үүсгүүр ашигласан ч болох аж.