Улсын томоохон бүтээн байгуулалтын ажилд залуусаа түлхүү оролцуулж, дэмжиж ажиллана

Улсын томоохон бүтээн байгуулалтын ажилд залуусаа түлхүү оролцуулж, дэмжиж ажиллана
                Монгол улсын эдийн засагт жинтэй хувь нэмэр оруулахаар хэрэгжүүлж  буй томоохон төсөл бол “Алтанбулаг худалдааны чөлөөт бүс” юм.  Энэхүү ажлын хүрээнд Алтанбулаг чөлөөт бүсийн 500 га газарт бүтээн байгуулалтын ажлуудыг өрнүүлж, олон улсын томоохон худалдааны чөлөөт бүс бий болох шинэ алхам нээгдэж байгаа нь талархууштай. Алтанбулаг чөлөөт бүс нээгдсэнээр олон улсын жишигт нийцсэн худалдаа үйлдвэрлэл, үйлчилгээ, казино, амралт зугаалгын бүс хөгжсөн боомт хот болгон хөгжүүлж, Монгол улсын эдийн засагт ихээхэн түлхэц болно гэж үзэж байгаа юм. 

      Өнөөдөр Алтанбулаг чөлөөт бүсийн захирагч П.Тогтохбаяр  Монголын барилгачин залуучуудын холбоотой хамтран
ажиллах санамж бичигт гарын үсэг зурлаа. Уг хамтын ажиллагааны санамж бичигт Алтанбулаг Чөлөөт бүсийн бүтээн байгуулалтанд Монголын барилгачин залуучуудын холбооны гишүүн байгууллагыг бүтээн байгуулалтын ажилд түлхүү оруулах, барилгын салбарт ажиллаж буй залуучуудаа дэмжин ажиллах, Чөлөөт бүсийн дэргэдэх Барилгачин Залуучуудын зөвлөл байгуулах, бүтээн байгуулалтын ажилд Монгол ажилчдыг авч ажиллуулах, Чөлөөт бүсийн ажилчдад Барилгын мэргэжлийн зөвлөх үйлчилгээг үзүүлэх, сургалт зохион байгуулах талаар  хамтран ажиллахаар тусгасан.

     Тус ажиллагааны үеэр Алтанбулаг чөлөөт бүсийн захирагч П.Тогтохбаяр хэлэхдээ: Залуучууд бид зах зээлийн шинэ эрин үед ирээд байна.  90-ээд онд зах зээлийн шилжилт явагдаж байсан шиг тийм цаг үе ирээд байна. Алтанбулаг чөлөөт худалдааны бүс нээгдсэнээр залуучууд бидэнд бизнесийн өргөн боломж нээгдэнэ. Гадаад зах зээлтэй харьцаж олон улсад тоглох том боломж бололцоо бүрдэнэ. Иймд залуучууд бид нэгдэн нийлж чадвал юуг ч бүтээж чадна. Цаашид залуучуудтайгаа хамтран ажиллаж, ихийг бүтээх болно гэдгээ илэрхийлсэн юм. 



Энэ мэтчилэн Монгол улсын томоохон бүтээн байгуулалтанд гадаадаас ажиллах хүч оруулж ирэлгүйгээр дотоодыхоо ажлын байрыг нэмэгдүүлэх, барилгын салбарт ажиллаж буй залуу боловсон хүчнээ чадваржуулах зэрэг өөрсдийн нөөц бололцоогоо бүрэн дүүрэн ашиглах нэгэн таатай санамж бичгийг байгуулж байгаа нь барилгын салбарт ажиллаж буй олон залууст маш том дэмжлэг болж байгаа хэрэг юм.
 

Холбоотой мэдээ