“Пачаманка” бол Перугийн эртний технологиор чулуу, ургамалтай газар дор барьсан байшин юм. Энэ нь дэлхий ээжийг хүндэтгэн хайрласан маш онцгой зохион байгуулалттай сууц юм. Куэчуа хэлэнд пача нь дэлхий, манка нь тогоо гэсэн утгатай аж. Эртний загварыг дуурайлган орчин үеийн технологийг хослуулан барьсан уг байшинг хоёр охинтой тогооч гэр бүлийн хос захиалжээ.

     Байшингийн бүхий хавтгай дээврээс Лима хот болон Номхон далайг ч харах боломжтой. Үйлчлүүлэгчид нь архитекторуудаас хөрш зэргэлдээх амины сууцнуудаас хамгийн хичээнгүй, сайхан байшинг барьж, ингэхдээ ирээдүйдээ хор хөнөөлгүй, алсыг харсан шинэлэг санаа хэрэгжүүлэхийг хүссэн байна.



     Лима хотод жилд 8 мм бороо л ордог учраас усгүй хуурай газарт ногоон байгууламж байгуулна гэдэг нь 100 км-ийн тэртээх Андес уулснаас ус авчрахтай л адил зүйл. Лимад Ногоон гэдэг үг “тансаг” гэсэн утгыг илэрхийлдэг.



     Энэхүү захиалгыг гүйцэтгэсэн мэргэжилтнүүд байшин гэхээсээ илүүтэй элбэг дэлбэг ногоон байгууламж бүхий сууц барихыг зорьжээ. Тиймээс архитекторууд талбайг ашиглан, толгод, хөндий, өндөрлөг тавцан, хадан цохио, агуй, жалга гуу, эрэг гэх мэт байгалийн тогтцуудыг бүтээж, тэр бүхэнд зориулан мод, ургамал, хүнсний ногоо, өвс, усны эргэмэл зэргийг тарьж ургуулсан байна.



     Олон хүнтэй гэр бүлд зориулагдсан уг сууцанд унтлагын өрөө, угаалгын өрөө, гал тогооны өрөө, хоолны өрөө, гэрийн оффис, граж гээд айлд хэрэгтэй бүхий л өрөө бий. Захиалагч гэр бүлийн хэрэгцээнд зориулан цэлгэр уужим зай, тэдэнд хэрэгтэй өрөө, тохижилтыг хослуулан сэтгэлд нь нийцэхүйц орчныг бий болгохоор архитекторын баг хичээн ажиллажээ.



     Дотоод болон гадаад засал чимэглэлийг Лима хотын уур амьсгалд тохируулан бүтээж (-14 хэмээс +28 хэм хүртэл), байшинд олон орц, гарц хийж, олон талаас нь орох боломжтой жим гарган, шаталсан бүтэцтэйгээр зохион бүтээсэн байна.