Өнөөдөр “Барилга Орон Сууц 2015” үзэсгэлэн яармаг Мишээл Экспо төвд нээлтээ хийлээ. Нээлтийн үйл ажиллагаанд НЗД-ын орлогч С.Очирбат, БХҮНТ-ийн ТУЗ-ийн дарга Г.Мягмар, БХБЯ-ны ХШҮХДА хэлтсийн дарга С.Бат-Эрдэнэ болон бусад Барилгын салбарын төлөөлөл, аж ахуй нэгжийн удирдлага оролцсон юм.

Энэ үеэр НЗД-ын орлогч С.Очирбат нээлтийн үг хэлсэн юм. “Бид ирэх жил Барилгын салбарын үүсэл хөгжлийн 90 жилийн ойг тэмдэглэнэ. Энэ цаг үед та бүхний сонорт чимэгтэй хэдэн тоо хэлье хэмээн бодсон юм. Өнөөдрийн байдлаар 16 мянга гаруй барилгын ажил эхлүүлэх зөвшөөрөл авсан. Өнгөрсөн жил 24 мянга гаруй айлын орон сууц барих зөвшөөрөл авч байсан. Үүнээс 4000 гаруй нь ашиглалтад ороогүй байна. Ирэх жилийн бүтээн байгуулалтын их ажил өрнөхөд өнөөдрийн үзэсгэлэнгийн ач холбогдол нь оршиж байгаа хэмээн бодож байна.”

БХҮНТ-ийн ТУЗ-ийн дарга Г.Мягмар, “Монголын барилгын салбарын бүтээн байгуулагч, хэрэглэгчдийг холбосон энэхүү өдөрлөг уламжлалт ёсоор зохион байгуулагдаж байна. Орон сууцны эрэлт нийлүүлэлтийн сөрөг үр дүнг сааруулах зорилгоор ипотекийн зээлийн урьдчилгаа иргэд 10 хувь, төрөөс 20 хувийг баталгаажуулах болон түрээсийн орон сууцыг шийдвэрлэх тухай зэрэг арга хэмжээг авч хэлэлцүүлж байгаа. Түүнчлэн барилгын бараа бүтээгдэхүүн экспортлох чиглэл рүү хандах нөхцөл бүрдсэн” гэлээ.

“Барилга экспо-2015” үзэсгэлэнг зохион байгуулах хорооны дарга Г.Батсүх, “Энэхүү үзэсгэлэн яармагт барилгын салбарт нэвтэрч байгаа шинэ техник, техонологи, шинэ материалуудаа олон нийтэд танилцуулан оролцож байгаа байгууллагуудад талархал илэрхийлье. Үзэсгэлэн маань “Бүтээн байгуулагчдаа дэмжье” гэсэн уриан дор зохион байгуулагдаж байгаа. Хүрэлцэн ирсэн та бүхэн бүтээн байгуулагчдаа дэмжин, үзэсгэлэнд идэвхитэй оролцоорой.” хэмээн уриалж байлаа.

       Тус экспо 23-ны өдрийг хүртэл үргэлжилэх тул орон сууц худалдан авах, барилгын материал, барилгын үнэ ханш, урамшуулалын талаар мэдээлэл авах гэж байгаа хүн бүр цагаа хэмнэн нэг дороос авах боломж гарлаа.