Өндөр хөгжилтэй улс орнуудад байдаг усан оргилууртай гүүр Улаанбаатар хотод ч бий болсоор. Нийслэлийн Захирагчийн ажлын албанаас нийслэлийн хөрсний бохирдол, тоосжилтыг бууруулах зорилгоор хэд хэдэн ажлуудыг хийхээр төлөвлөсөн. Эдгээр ажил нь Улаанбаатар хотын гүүрүүдэд усан оргилуур буюу уса хөшиг хийх юм. Улсын их баяр наадмын өмнө Зайсангийн гүүрэнд усан хөшиг хийж, ашиглалтад хүлээлгэн өгч байсан бол өнөөдөр Арслантай гүүрний усан хөшигний нээлтийг хийлээ. Нээлтийн ажиллагаанд Улаанбаатар хотын Ерөнхий менежер бөгөөд Захирагчийн ажлын албаны дарга Б.Бадрал, “Нийтийн үйлчилгээний Улаанбаатар нэгтгэл” НӨҮГ-ын дарга Д.Энхсайхан болон албаны  бусад хүмүүс оролцсон.
  Уг ажлыг  “Хан урсгал” ХХК хийж гүйцэтгэсэн байна. Усан хөшиг нь шөнийн цагаар гэрэлтдэг бөгөөд өглөөний 08 цагаас үдшийн 23 цаг хүртэл ажиллах гэнэ. Цаашлаад яг ийм усан хөшгийн Маршал болон Дунд голын гүүрэнд хийх төлөвлөгөөтэй байгаа тухай албаны хүмүүс онцолсон.

Түүнчлэн Арслантай гүүрний дээд, доод хэсгийг цаашид тохижуулах юм байна. Дашрамд дурдахад цаашид уг усан хөшигний хэвийн үйл ажиллагааг “Нийтийн үйлчилгээний Улаанбаатар нэгтгэл” НӨҮГ хариуцаж ажиллах аж.