Дубай бол дэлхий дээрх хамгийн өндөр барилгуудын өлгий, олон олон анхдагчуудын эх орон гэдгээрээ алдартай хот. Мөн анхны 3D хэвлэмэл оффисийн барилгыг байгуулж буйгаараа энэ технологийг нэвтрүүлсэн анхдагч болж байна. Оффисийн барилга нь давхарга тус бүрээр хэвлэгдэх бөгөөд хэвлэгч нь 6,1 метр орчим өндөртэй хавтан зэргийг гаргах боломжтой юм. Барилгын талбайд тухайн давхарга хавтангуудыг угсрах бөгөөд энэхүү оффисийн барилга нь нийт 6,000 орчим м.кв талбайтай болно гэсэн үг. 3D хэвлэмэл уг барилгыг ердөө хэдхэн долоо хоногийн дотор барьж гүйцэтгэх аж.

Анхны 3D оффисийн барилга нь Ирээдүйн Музейн ажилтнуудын гэр болох бөгөөд энэ нь маш олон төрлийн зориулалтаар ашиглагдах уян хатан нөхцөл боломжтой юм. Уг барилга нь 3D хэвлэгчээр хийсэн жижиг дижитал үйлдвэрлэлийн байгууламж, интерьерийн тавилга хэрэгсэл болон бүхий л бүрэлдэхүүн хэсгийг багтаасан 3D хэвлэлийн үзэсгэлэнтэй байх гэнэ.


Энэхүү ирээдүйн оффис нь WinSun Global болон Дубай хот хоорондын хамтын ажиллагааны хүрээнд гүйцэтгэх төслийн нэгээхэн хэсэг аж. Тэдний хувьд 3D хэвлэгчийн ашиглан хоногт 10 жижиг байшин барих төслийг хамтран хэрэгжүүлж байгаа юм. Энэ нь 3D хэвлэгчээр үр ашигтай, бодит бүтээн байгуулалт хийж байгаагийн анхны тод жишээ болж байна.


Арабын Нэгдсэн Эмират улсын Үндэсний Инновацийн хорооны тэргүүн, Хэрэг эрхлэх танхимын сайд, энэхүү барилгыг 3D хэвлэлийн салбарт хийгдэж буй бүтээлч ажлын баталгаа, үр дүнтэй хэрэг болж байгааг онцлон тэмдэглэжээ. Энэ нь дизайны салбарыг өөрчлөхөд гол үүргийг гүйцэтгэж, барилгын салбарыг дахин сэргээсэн нээлт болно гэдэгт итгэж байгаагаа тэрээр мэдэгдсэн байна. Энэ бол 3D хэвлэмэл байшин амьдралд хэрэгжиж буйгийн анхны жишээ, цаашид ч их бүтээн байгуулалтыг авчирна хэмээн сайд хэвлэлийнхэнд өгсөн ярилцлагадаа онцолжээ.