Монголын худалдаа аж үйлдвэрийн танхимын дэргэдэх Барилга, дэд бүтцийн ээлжилт хуралдаан өнөөдөр болж өнгөрлөө. Тус хуралдаанд БХБ-ын сайд Д.Цогтбаатар анх удаа оролцож барилгын салбарын өнөөгийн байдал, учирч буй хүндрэл бэрхшээл, гарах арга замын талаар ярилцсан юм. Хуралдаанд барилгын мэргэжлийн төрийн бус байгууллагын төлөөлөгчид  болоод  тус салбарт хийж бүтээж буй компаниудын удирдлагууд оролцож шинэ сайдынхаа цаашид хийж бүтээхээр зэхэж буй ажлын талаар сонслоо.
Уулзалтын үеэр Д.Цогтбаатарын хэлсэн үгнээс товчлон хүргэхээр бэлдлээ. Тэрбээр  “Юуны өмнө барилгын салбарын хууль эрх зүйн орчинг боловсронгуй болгож, төрийн болон төрийн бус байгууллагууд, иргэд, аж ахуйн нэгж  хоорондын харилцаа, хүлээх үүрэг, хариуцлагыг илүү тодорхой болгоно.  Салбарын хууль тогтоомж, норм, нормативын баримт бичиг, бодлогын баримт бичиг боловсруулах ажилд хувийн хэвшил, төрийн бус байгууллагуудын төлөөллийг татан оролцуулж ажиллана. Барилгын материалын чанарын хяналтын тогтолцоог үйлдвэрлэлийн баталгаажуулалтын хэмээн цогцоор шийднэ.
Мөн барилгын салбар дахь  хөдөлмөр аюулгүй байдал, эрүүл ахуйн асуудлыг улсын хэмжээнд нарийвчлан зохицуулсан нийтлэг журам гаргаж мөрдүүлэхээр ажиллаж байна" хэмээсэн.



Түүнчлэн барилгын зураг төслийн магадлалын ажлыг сайжруулах болоод Газрын харилцаа, хөрөнгө оруулалтын чиглэлээр олон ажлууд хийх гэж байгаа тухай илтгэл тавьж, энэхүү ажлын талаар санал шүүмжлэлээ хэлэхийг санал болгосон. Салбарын бизнес эрхлэгчид ч сайддаа өөрийн санал бодол тулгамдсан асуудлаа чөлөөтэй ярилцсан юм.