Барилга хот байгууллалтын сайд Д.Цогтбаатар ажлаа авсан цагаас хойш барилгын салбарын мэргэжлийн төрийн бус байгууллагынхантай уулзалт хийсээр буй. Тэрбээр өнөөдөр Монголын архитектурын эвлэл /МАЭ/-ийн үйл ажиллагаатай танилцлаа.  Монголын үе үеийн архитекторууд салбарын сайдыг ирэх сургаар Эвлэлийн байрандаа цуглажээ.
       Монголын архитектурын эвлэл нь 1956 онд байгуулагдсан архитектор хот байгуулалтын үйл ажиллагаанд оролцож байгаа мэргэжлийн архитекторуудын нэгдсэн нийгэмд үйлчлэх сайн дурын байгууллага бөгөөд Олон улсын болоод Азийн архитектурын холбооны албан ёсны гишүүн байгууллага юм.  550 гаруй архитекторыг эгнээндээ нэгтгэсэн энэ байгууллагын  барилгын салбарт эзлэх хувь нэмэр ч энэ хэмжээгээр их юм. Тийм ч учраас салбарын сайд нь эдгээр архитекторуудын үгийг сонсохоор хүрэлцэн ирсэн нь лавтай. Д.Цогтбаатар ирсэн даруй МАЭ-ийн удирдах зөвлөлийн гишүүдтэй уулзаж, танилцсаны дараа нийт гишүүдийн төлөөлөлтэй уулзаж, яриа өрнүүлсэн. Энэ үеэр МАЭ-ийн ерөнхийлөгч Э.Хүрэлбаатар өөрийн байгууллагын үйл ажиллагааны талаар танилцууж, ирээдүйд хийх ажил, салбарын яамнаас хамтарч ажиллах хүсэлтийн талаар мэдээлэл өгсөн.


         Д.Цогтбаатар уулзалтын үеэр хэлсэн үгэндээ “Архитекторууд та бүхэн бол Монголын нэрийн хуудас юм. Монголыг мал аж ахуйн орон бус хотжсон орчин үеийн улс гэдгийг та нар харуулж байдаг. Энэ улсад ямар барилга баригдахыг та бүхэн мэддэг. Тийм учраас би ингэж хэлж байна. Архитектор гэдэг мэргэжлийг, энэ ажлыг дурын хүн хийдэггүй. Инженер хүний нарийн тооцоолол, урлагийн хүний уран мэдрэмж энэ бүгд хослуулан байдаг гайхамшигтай ажил юм. Мэдээж та бүгдийг санаа бодол, мэргэн зөвлөгөөг салбарын бодлогод зайлшгүй тусгах шаардлагатай тийм ч учраас өөрсдийн санал бодлыг нэгтгээд яаманд албан ёсоор хүргүүлээрэй. Би үзэж танилцсаны дараа шийдвэл зохих зүйлийг өөрийн эрх мэдлийн хүрээнд заавал шийдэх болно” хэмээсэн.


Мөн уулзалтын үеэр архитекторууд өөрийн санал шүүмжлэлээ салбарын сайддаа хэлсэн бөгөөд үүн дотор барилга, хот байгуулалтын ажлын хүрээнд буй бэрхшээл, сул тал мөн ололтын талаар дэлгэрэнгүй ярьсаныг сайд ихэд хичээнгүйлэн тэмдэглэж авч байсан юм.  Ихэнх архитекторууд “Архитекторын хуультай болох,  төсвийн тодорхой хэсгийг зарцуулах эрхийг орон нутагт шилжүүлсэнээс үүдэж хөдөө орон нутагт чанаргүй барилга ихэд баригдаж байгааг хууль тогтоомжийн хүрээнд зохицуулах, барилгын салбарын тусгай зөвшөөрлийг хүртэл цэгцлэх санал гаргаж байна.