ХБНГУ-аас барилгын салбарт 416 сая ам.долларын хөрөнгө оруулалт хийгджээ
Гадаадын хөрөнгө оруулалттай компаниудын 3.1 хувь нь барилга байгууламж, барилгын материал үйлдвэрлэлийн салбарт үйл ажиллагаа явуулж байна. Зөвхөн ХБНГУ-аас гэхэд энэ чиглэлд хагас сая ам.долларын хөрөнгө оруулалт орж ирсэн болохыг Хөрөнгө оруулалтын газраас мэдээллээ. Тухайлбал “Гранд байшин” компани 2013 онд эхлүүлсэн хамтын ажиллагааны үр дүнд ХБНГУ-ын “Weiler” компанитай хамтран дулаан, дуу тусгаарлалт сайтай, удаан эдэлгээтэй, угсармал бетон үйлдвэрлэх үйлдвэрийг 30 тэрбум төгрөгийн хөрөнгө оруулалтаар ашиглалтад оруулаад байна.
Энэхүү үйлдвэр нь жилд 3000 айлын орон сууц барихад шаардлагатай бетон хавтан, хийц үйлдвэрлэх хүчин чадалтай юм. Үүнээс гадна “Таван Богд” компани Австри улсын технологиор хонины ноос боловсруулах "Дулаан гэр" үйлдвэрийг өнгөрсөн онд байгуулсан байна. Энэхүү үйлдвэр нь түүхий эдээрээ дан хонины ноос ашигладгаараа онцлог юм. Бизнесийн хүрээнд компаниуд ийнхүү хамтарч байгаа бол хот байгуулалтын салбарт ч мөн Европын компаниудтай хамтрах тухай асуудал яригдаж байна. Тухайлбал “Их Майдар” төслийн хоёр дахь шатанд Төв аймгийн Сэргэлэн суманд 200 мянган хүн оршин суух дагуул хот байгуулахаар төлөвлөж байгаа юм. “RSAA”, “Drees and Sommer” болон “Trans Solar” зэрэг Европын таван компанийн оролцож байгаа “Майдар эко сити” төслийн хүрээнд дагуул хот байгуулах ерөнхий төлөвлөгөө бэлэн болоод байна. Урьдчилан тооцоолсноор “Майдар эко сити”-ийн зөвхөн дэд бүтцэд гэхэд хоёр тэрбум ам.долларын хөрөнгө оруулалт шаардлагатай гэж үзжээ. Үүнээс гадна Монгол Улсын Ерөнхийлөгч Ц.Элбэгдорж ХБНГУ дахь айлчлалынхаа хүрээнд зохиогдсон Бизнес форумын үеэр “Майдар эко сити” төслийг танилцуулсан юм.