Мэргэжлийн хяналтын ерөнхий газар болон Нийслэлийн мэргэжлийн хяналтын газар хамтран өчигдөр нийслэлд хотод зөвшөөрөлгүй баригдаж байсан хоёр ч барилгад акт үйлдэж, лацдав. Учир нь уг хоёр барилга барилгын анхан шатны тусгай зөвшөөрлүүдийг аваагүй байна.
    Эхний барилга нь Хан-Уул дүүргийн 11-р хороо Зайсан дахь бурхантай хөшөөний зүүн талд байрлах бөгөөд энэхүү барилга нь иргэн н.Баяндалайнгийн нэр дээр байдаг. Барилга зөвшөөрөлгүй баригдаж байгаа талаар холбогдох албаныхан удаа дараа дуудан уулзахыг хүссэн ч ирээгүй байна. Тус барилга нь анх нэг давхар хүнсний дэлгүүр байсан ч шөнийн цагаар барилгын ажлыг үргэлжлүүлсээр одоогоор гурван давхар хүртэл нь барьсан байна. Уг барилга нь батлагдсан зураг төсөвгүй, ажил эхлэх зөвшөөрөлгүйгээс гадна газрын зөвшөөрөл нь тодорхойгүй байгаа юм байна. Анх улсын мэргэжлийн байцаагч 2014 оны 10-р сард хяналт хийн үйл ажиллагааг нь зогсоож байсан ч ийнхүү дураараа авирлан барилгын ажлыг үргэлжлүүлэх болсон учир хяналтын байгууллагаас үйл ажиллагааг нь зогсоох акт үйлдэн, лацдав. Энэхүү лацыг хөдөлгөсөн тохиолдолд эрүүгийн хариуцлага хүлээлгэдэг байна.



    Удаах нь Сүхбаатар дүүргийн нутаг дэвсгэр Монголын Хүүхдийн ордны хойно баригдаж байгаа барилга юм. Тус барилга “Глобал хурд”  ХХК-ийн эзэмшилд байдаг бөгөөд мөн л зөвшөөрөл байхгүй гэнэ. Зураг төсөл нь анх 12 давхараар хийгдсэн ч батлагдаагүй хэр нь ийнхүү үйл ажиллагаагаа үргэлжлүүлсэн учир ийнхүү Мэргэжлийн хяналтын ерөнхий газраас арга хэмжээ авч байгаа аж.  Түүнчлэн зөрчилтэй, зөрчлөө арилгаагүй, улсын байцаагчийн акт, албан шаардлагыг биелүүлдэггүй, хэрэгжилтийг хангуулж ажилладаггүйгээр барахгүй үйлчилгээний зориулалт бүхий барилга магадлал хийлгээгүй зураг төсөлтэй, тусгай зөвшөөрлийн хугацаа дууссан байхад барилга угсралтын ажил гүйцэтгэсэн, бетон цутгалтын ажил гүйцэтгэхдээ хоногийн дундаж 5 хэмээс бага үед цутгасан бөгөөд бат бэх нь тодорхойгүй, лабораториор баталгаажуулаагүй, барилга эхлүүлэх, үргэлжлүүлэх зөвшөөрөлгүй байсан зэрэг зөрчил илэрчээ. Илэрсэн зөрчилд арга хэмжээ авч, барилгын ажлыг зогсоосон хэдий ч захиалагчийн зүгээс гүйцэтгэгч компаниа сольж, зөвшөөрөлгүйгээр дахин барилгын ажлыг эхлүүлсэн байна.
Дуудсан цагт ирдэггүй барилга эзэмшигчдийг албадан ирүүлэх ажлыг цагдаагийн байгууллагын дэмжлэгтэйгээр ирэх 7 хоногоос хэрэгжүүлж эхлэх гэнэ.