Нийслэл хотод хүн амын хэт төвлөрлөөс шалтгаалан үүдэн гарч буй бас нэгэн том зовлон бол инженерийн шугам сүлжээний аюулгүй байдал юм. Өнөөдөр Улаанбаатарт цахилгаан, дулааны шугам сүлжээ болоод ус хангамжийн шугам сүлжээнээс хуулинд заасан 5м хүртэлх зайнд баригдсан барилга байгууламжийг хайхаас хууль зөрчиж баригдсаныг нь олох илүү амар болсон гэлтэй.




 
      Мэргэжлийн хяналтын ерөнхий газар холбогдох төрийн байгууллагатай хамтран нийслэлийн инженерийн шугам сүлжээний аюулгүй байдлыг хангах зорилгоор хяналт шалгалт хийхэд нийт 5588 аж ахуйн нэгж хууль зөрчсөн болохыг тогтоосон байна. Үүнээс Улаанбаатар цахилгаан сүлжээ ТӨХК-ны шугам сүлжээнд хамгийн их нь буюу нийт зөрчлийн 3880 нь байжээ. Өөрөөр хэлбэл өндөр хүчдэлийн аюулгүйн бүсэд нэвтэрч барилга байгууламж барьсан, хашаа хайс хатгасан тохиолдол хамгийн их байсан байна. Өндөр хүчдэлд цохиулж хүний амь нас эрсдсэн тухай мэдээ сүүлийн үед ойр ойрхон гарч байгаа нь магад үүнтэй холбоотой биз ээ. Цааш нь тоочвол дулааны магистраль шугамтай тулгаад 2 давхар граж барьсан хэнэггүйчүүд, ус хангамж, ариутгал татуургын шугам сүлжээний аюулгүй байдлыг алдагдуулсан хууль дүрэм зөрчигчид олон байгаа юм. Хамгийн харамсалтай нь энэ тоо жилээс жилд ихсэж байгаад хамаг учир байна.


Хяналт шалгалт хийсэн мэргэжлийн байгууллагаас юуны учир энэ тоо нэмэгдэж байгааг лавлахад:
      1.Иргэд, аж ахуйн нэгж байгууллагууд зөвшөөрөлгүйгээр дур мэдэн инженерийн шугам сүлжээний хамгаалалтын зурваст гэр, хашаа, граж, агуулах зэрэг барилга обьект барьдаг.
      2. Нийслэл, дүүргийн Засаг дарга нар инженерийн шугам сүлжээний хамгаалалтын зурваст хангагч байгууллагын зөвшөөрөлгүйгээр давхардуулан газар олголт хийдэг хэмээн тайлбарлав. Засаг захиргаа байхгүй мэт сонсогдоно. Хэн дуртай газраа юу ч барьж болдог, түүнийг нь хориглодог, шийтгэдэг эрхтэй байгууллага алга. Энэ мэт сүүлийн 20 жил үргэлжилж байна.
        “Шаварт унасан шарын эзэн хүчтэй” гэгчээр цахилгаан, дулаан, ус хангамжийн газраас аюул осолтой газар болохыг удаа дараа сануулдаг ч Монгол хүний хэнэггүй зангаар төдийлөн анхаарч үздэггүй төдийгүй шугам сүлжээний засвар үйлчилгээ болоход хувийн өмчид халдаж байгаа талаар шүүхэд өгөх гээд явж байдаг хүмүүс ч бас байдаг тухай сонсогдоно.
     Мэргэжлийн хяналтын газраас хяналт шалгалт хийдэг, торгуулийн арга хэмжээ авдаг нөхцөл байдал яг хэвээр байдаг ийм дүр зураг хэзээ арилах вэ?
Холбогдох газрууд энэ жил хамтдаа шалгалт хийж хамтдаа тэмцэж байгаа болохоор ирэх жилээс үр дүнг нь харна гэж найдаж байгаа гэнэ. Тэгвэл хамтдаа найдах л үлдэж, Улаанбаатар хотын инженерийн шугам  сүлжээний аюулгүй байдал хэзээ хангагдах нь хэнд ч тодорхойгүй үлдлээ.