Хуучин барилгыг Пассив хаус болгох нь

Хуучин барилгыг Пассив хаус болгох нь
        Эрчим хүчний зарцуулалт өндөр, дулааны алдагдал ихтэй хуучин байшин барилгыг сэргээн засварлаж Пассив хаус болгож болно. Ийм туршлагаараа Герман улс дэлхийд толгой цохидог. Шинэ барилга барьснаас хуучин барилгаа шинэчлэн засварлах нь зарцуулах хөрөнгө санхүүгийн хувьд хамаагүй бага байхын зэрэгцээ эрчим хүчний хэрэглээгээ хэмнэх  томоохон боломж юм. 
      Барилгаа сэргээн засч шинэчлэхдээ түүнд хэрэглэх барилгын материалыг аль болох өндөр чанартайг нь сонгох шаардлагатай. Хэрэв засвар шинэчлэлийг барилгынхаа хэсэг бүрт Пассив барилгын стандартын шаардлага хангахаар хийвэл эрчим хүчний хэмнэлтийн хамгийн таатай түвшин, хамгийн олон хэрэглэгчийн сэтгэл ханамж, мөн эдийн засгийн хамгийн сайн үр дүнд алхам алхмаар хүрэх боломжтой.
    Эрчим хүчний хэмнэлт бол Пассив барилгын олон үр ашгийн хамгийн чухал нь юм. Пассив барилга бусад барилгатай харьцуулахад “хоёр дахь түрээс” гэж нэрлэгддэг ашиглалтын зардлуудыг 75-90% хэмнэдэг. Хамгийн гол нь хуучин барилгынхаа шаардлагатай хэсгийг олж шинэчлэх нь чухал. Жишээ нь, сайн чанарын дулаан тусгаарлалтыг хийснээр тухайн барилгын хөгцөрч мөөгөцөрдөх эрсдлийг арилгана. Пассив барилгын цонх нь дотор талд дулаахан байлгаж хөлрөлт үүсэхээс хамгаалдаг. Ингэснээр гадна хана хөгцрөх вий гэж айхгүйгээр тавилга сэлт байрлуулж өрөө тасалгаагаа бүрэн дүүрэн ашиглах боломж нэмэгдэх юм.


Зураг; Шведийн Брогарден хотын орон сууцны барилгыг засварлан Пассив барилга стандартад нийцүүлжээ. Зүүн талд засварын өмнөх байдал, баруун талд засварын дараах байдлыг харуулав.


Дулаан тусгаарлалт
     Манай орны нөхцөлд дулаан дамжуулалтын итгэлцүүр нь 0.04 Вт/(м·К) байх дулаалгын материалын хувьд хана болон дээврийн дулаан тусгаарлалт 220 мм байхад эдийн засгийн хувьд тохиромжтой байдаг. 320 мм байх дулаан тусгаарлалт ашиглалтын зардлын хувьд илүү хэмнэлттэй.  Учир нь энэ үед цахилгаан зарцуулалт харьцангуй багасч, эрчим хүчний хэмнэлт бий болдог.
    Гадна хананд дулаан тусгаарлалт хийснээр уг хананы зузаан мэдээж ихэснэ. Дулаан тусгаарлалт хийхдээ цонхыг мөн шинэчилж байвал цонхоо дулаалгын үенд тааруулан угсарвал дулааны гүүрээс сэргийлж өгдөг. Цонхыг хуучин байранд нь угсарвал ханандаа гүн суусан мэт гадна өнгө үзэмжийг алдагдуулна.  Нэмэлт дулаан тусгаарлалт хийж байгаа бол гадна фасадны дизайныг өнгөлгөөний тоосго, чулуун шавардлаган өнгөлгөө хийх гэх мэтээр өөрчлөх боломжтой.
Дулаан тусгаарлалтыг хананы гадна талд хийвэл шинжлэх ухааны болон технологийн талаасаа зөв гэдгийг мэргэжилтнүүд зөвлөдөг. Хэрвээ барилга нь гадна талаасаа боломжгүй зөвхөн дотор талдаа дулаан тусгаарлалт хийгдэхээр бол энэ нь огт дулаалгагүй байснаас дээр юм. Дулаан тусгаарлалтыг дотор талд хийхдээ маш сайн төлөвлөн чадварлагаар гүйцэтгэх хэрэгтэй. Гадна дулаалгатай харьцуулахад дотор талд тусгаарлалт хийхэд хэд хэдэн асуудал тулгарах бөгөөд хүйтэн агаар дотогш орж чийг авахуулахгүйн тулд бүх өрөөний битүүмжлэлийг сайтар хийж, дулааны гүүрийг бүхий л бололцоогоороо хаасан байх ёстой.
Цонх, хаалга
     Хуучин барилгын хоёр шиллэгээтэй, давхар хүрээтэй гээд бараг бүх цонх маш муу дулаалгатай байдаг. Давхар шиллэгээтэй, дулаан хамгаалалтын гадаргатай эсвэл инертийн хийгээр дүүргэсэн зэрэг шинэ төрлийн цонхнууд  үнэ өртгийн хувьд арай өндөр боловч эрчим хүчний хэмнэлттэй.  “Ихийг хэмнэхийн тулд ихийг зарцуул” гэсэн зарчмыг байнга санаж цонхоо шинээр солих бол Пассив барилгын стандартад нийцсэнийг сонгосон нь илүү үр дүнтэй. Хүйтэн цаг ууртай манай орны хувьд гурван давхар шиллэгээтэй, тусгаарлагчтай хүрээ бүхий цонх илүү тохиромжтой байдаг.
Нэмж гүйцэтгэх зарим ажлууд
    Шинэ барилга барихад нэмэлт дулаан тусгаарлалт хийх ёстой хийц бол шалны хучилт юм. Гэвч энэ нь хуучин барилгын хувьд  боломжгүй зүйл. Нэгдүгээр давхрын шалны хучилт, эсвэл зоорины хучилтыг гадна талаас нь хананы дулаалга, суурийн дулаалга хүртэл тасралтгүй үргэлжлэхээр хийнэ.
Дулааны гүүрийг бууруулахын тулд суурийн хананд дулааны хамгаалалт хийх нь эдийн засгийн хувьд ч ашигтай бус. Үүний оронд “хажуугийн тусгаарлалт”-ыг байгаа дулаалгатай холбон (жишээ нь: суурийн хучилттай нийлж байгаа хэсэгт) суурийн хананы дагуу хийнэ.
Битүүмжлэлийг сайжруулж хөгц чийгнээс сэргийлэх
    Тоосгон болон бетон хучилттай барилгад дотор шавардлага хийхдээ шууд шалтайн нийлүүлж хийвэл сайн битүүмжлэл болж чадна. Модон дам нуруу хучилттай барилгын хувьд гадна хананы холбоосууд дээрх битүүмжлэлд найдахад тун хэцүү байдаг.
Гадна хананд битүүмжлэл сайжруулах давхарга хийхийн тулд гадаргууг наалддаг бүрэгч материалаар бүрэх нь зүйтэй. Хэрэв байшингийнхаа ашиглалтын хугацааг уртасгая гэвэл дээвэр юмуу хамгийн дээд давхрын таазны хучилтад чийгний эсрэг хамгаалах үе хийнэ. Энэ нь битүүмжлэлийг давхар сайжруулж өгдөг.
    Дулаалгын байрлалаас хамааран суурийн хучилт юмуу эсвэл шалны төмөр бетон хучилт барилгын хамгийн доод хэсэг болдог. Хэрэв суурийн хучилтад ямар нэг ан цав байвал цементэн тэгшлэгч үе хийж битүүмжлэлийг мөн сайжруулж болно. Шинэ цонх угсарсны дараа амалгааны шавардлагыг сайн хийх хэрэгтэй.


Зураг: Засвар шинэчлэл хийсний өмнө (зүүн) ба дараах (баруун) байдлыг харуулсан дулааны тархалтыг харуулсан байдал

       Сайтар битүүмжлэгдсэн барилгын хаших хийц нь дулаан агаар гадагшлах, хүйтэн агаар дотогш нэвтрэхээс сэргийлж барилгын эвдрэл гэмтлээс хамгаалдаг.  Дулаан, чийглэг агаар хана, дээврийн ан цаваар нэвтэрснээр барилгын гадна хийцийн хүйтэн орчинд хөлрөлт болон хөгц үүсгэж, энэ нь барилга гэмтэх үндэс болдог. Барилгын шинэчлэл засвар хийхдээ агаарт болон барилгын элементийн гадаргууд их хэмжээний чийг хуримтлагдахаас сэргийлэх зорилгоор агаар сэлгэлтийн  системийг суурилуулна.
       Барилгын гадна талд хийх дулаан тусгаарлалт нь хөгцнөөс сэргийлэх хамгийн сайн арга юм. Учир нь дулаалга барилгын гадна хана, дээвэр, суурийн хучилт зэргийн дотор гадаргуугийн температурыг өсгөснөөр агаар дахь чийг хөлөрч, уур болж чадахгүй. Дулааны гүүр үүсэж болох цэгийг мөн багасгана.

Жич: Энэхүү зөвлөмжийн дэлгэрэнгүйг Барилга.МН сэтгүүлийн дугаар 49-өөс унших боломжтой.

Холбоотой мэдээ