Хөшигийн хөндийн нисэх буудлын зурвасын хучилтыг хийж эхэллээ

Хөшигийн хөндийн нисэх буудлын зурвасын хучилтыг хийж эхэллээ
        Хөшигийн хөндийд баригдаж байгаа Олон улсын нисэх онгоцны шинэ буудлын аэродромын хөөрч, буух зурвасны бетон хучилтын ажил өчигдрөөс эхэлжээ. 
          Герман улсад үйлдвэрлэсэн, олон улсад бетон зам тавихад ашигладаг “Вертген” технологийн автомат машиныг энд ашиглаж байгаа бөгөөд энэхүү машин нь бетон замыг 15 метр хүртэл өргөн, 50 см хүртэл зузаантайгаар хучиж дэвсэж чаддаг, зогсолтгүй 24 цагийн турш бетон зам үйлдвэрлэх хүчин чадалтай машин аж.
         Олон улсын нисэх буудал барих төсөл хэрэгжүүлэх нэгжийн Аэродром хариуцсан менежер Д.Цогням: “Энэ технологийг манай улсад анх удаа аэродром барихад ашиглаж байгаа. Монгол орны цаг агаарын онцлогийг тооцоолж төмөр хүчитгэсэн торыг шинээр ашиглан дэвсэж байгаа. Ингэснээр 40 жил ашиглаад дахин шинэчлэн засварладаг бетон замын эдэлгээний хугацааг 10 жилээр уртасгах давуу талтай” гэдгийг онцлож байлаа.
        Хөшигийн хөндийн Олон улсын нисэх буудлын аэродромын хөөрч, буух зурвас нь 3600 метрийн урттай, 45 метрийн өргөнтэй байх бөгөөд 7.5 метрийн асфальт бетон хөвөөг хоёр талаар нь дэвсэх ажээ. Энэхүү ажлыг гурван сарын хугацаанд хийж дуусгах төлөвлөгөөтэй байгаа бөгөөд зурвасны хучилтын ажлыг Япон, БНСУ-ын инженер-техникийн багийнхан гүйцэтгэж байгаа юм.

Холбоотой мэдээ