“Буянт-Ухаа 1” хороолол сугалаа сугалуулж оршин суугчдаа тодруулсан ч ихэнх иргэд нь банкны зээлийн шалгуур хангаж яадахгүйн улмаас 8 хувийн ипотекийн зээлд хамрагдаж чадахгүй байгаа билээ. Иймд уг хорооллыг барьсан “Төрийн орон сууцны корпораци” иргэдийн зээлд хамрагдахад туслах зорилгоор “Монголын ипотекийн корпораци”-тай зөвшилцөл хийж байгаа юм байна.
      Түүнчлэн одоогоор “Буянт-Ухаа 1” хорооллын 28 барилгад барилга байгууламжийг байнгын ашиглалтад оруулах Улсын комисс ажиллаж дууссан бөгөөд хараахан комиссын акт, дүгнэлт гаргаагүй байгаа аж. Уг хороололд орон сууцаа сонгон урьдчилгаа 30 хувийг төлөн захиалгын гэрээ байгуулсан иргэдийн арилжааны банкаар олгогдож буй 8 хувийн хүүтэй зээлд хамрагдах 60 хоногийн хугацааг Улсын комиссын акт гарсан өдрөөс эхлэн тооцохоор болжээ. Дашрамд дурдахад уг хороололд одоогоор 1300 иргэн орон сууцаа сонгосноос 1000 гаруй хүн урьдчилгаа 30 хувиа төлжээ.
     Харин “Буянт-Ухаа” хорооллыг захиалж бариулсан “Төрийн орон сууцны корпораци”-аас орон сууц худалдан авах эрхтэй болсон  иргэдийг энэ сарын 25-ны дотор орон сууцаа сонгон 30 хувийн урьдчилгаа төлбөрийг төлөн, захиалгын гэрээгээ байгуулахыг анхааруулж байна лээ.