Дэд төвийн ажил эхэлсэн үү ?

                          Дэд төвийн ажил эхэлсэн үү ?
                                     Эхний санхүүжилтийг шийдсэн
 Хаана юу  байгаа нь ойлгомжгүй эмх замбараагүй төлөвлөгдсөн гэр хорооллын нийгэм болоод инженерийн дэд бүтцийг шийдэхийн тулд зургаан дэд төв байгуулах хөтөлбөр Улаанбаатар хотын 2020 он хүртэл хөгжүүлэх ерөнхий төлөвлөгөөнд багтаасан.Нийслэлийн Засаг дарга бөгөөд Улаанбаатар хотын захирагч Э.Бат-Үүл Сонгинохайрхан дүүргийн хорооны иргэдтэй уулзах үеэрээ Дэд төв байгуулах ажил шийдвэрлэх шатандаа орсон. Баянхошуу, Сэлбийг дахин төлөвлөж, хотын дэд төв болгох хэлэлцээрийг баталсан” хэмээн өнгөрсөн зургаадугаар сарын сүүлээр онцолсон билээ.  Засгийн газрын хуралдаанаар  эхний ээлжийн 104 сая ам.доллартай тэнцэх санхүүгийн эх үүсвэрийгшийдчихвэл энэ сарын сүүлчээр эхэлнэ хэмээж байсан төслийн ажил ямар шатанд байгааг НЗДТГ-аас асууж лавлахад “Эхний шатны санхүүжилтийг шийдвэрлээд баталчихсан.Зураг төслийн ажил эхэлсэн байгаа. Олон улсын зөвлөхүүд ажилдаа орсон. Гэхдээ эхний санхүүжилт шийдэгдсэн гэхээр барилгын ажил эхлэх юм шиг ойлгох вий” гэсэн хариуг өгсөн юм. Эдийн засгийн хөгжлийн сайд Н.Батбаяр, Азийн Хөгжлийн Банкны Монгол дахь суурин төлөөлөгч Роберт Шоэллхаммер нар "Улаанбаатар хотын гэр хорооллыг хөгжүүлэх, хөрөнгө оруулалтын дэмжих хөтөлбөр"-ийн нэгдүгээр үе шатны төслийн зээлийн хэлэлцээрт энэ сарын 1-нд зурснаар ажлын эхлэл тавигдсан гэж үзэж болно.
                                          Юу юу баригдах вэ?                                                     
  Есөн жилийн хугацаанд хэрэгжүүлэх уг хөтөлбөрийн хүрээнд Улаанбаатар хотын гэр хорооллыг дахин төлөвлөж, цэвэрлэх байгууламж, дулаан хангамжийг сайжруулж, бичил зээл олгон, төсөл хэрэгжүүлэх байгууллагыг чадавхижуулах зэрэг цөөнгүй ажил хийнэ. Үүнээс хамгийн том нь 6-10 дэд төв байгуулах ажил юм. 2014-2016 онд Баянхошуу, Сэлбэ, дараагийн ээлжинд 2016-2020 онд Хайлааст, Чингэлтэй, гуравдугаарт буюу 2018-2023 онд Амгалан, Улиастай дэд төв байгуулахаар төлөвлөөд байна. Хамгийн эхнийх болох Баянхошуу дэд төвийг 162 га талбайд барина. Уг төв 6.15 км авто зам, явган хүний 24.6 ам метр зам, байгальд ээлтэй, хамгийн сүүлийн үеийн технологийн дулааны хангамжийн байгууламж хоёр, нэг цэцэрлэг, мөн мэргэжил сургалт, үйлдвэрлэлийн нэг төвтэй байхаар эхний ээлжинд төлөвлөжээ. Азийн хөгжлийн банк болон Европын хөрөнгө оруулалтын банкны зүгээс олгох хөнгөлөлттэй зээл, арилжааны зээл ба буцалтгүй тусламжийг оруулан тооцсон дүнгээр нийт 82.08 сая aм.доллар, Улаанбаатар хотын захиргаанаас 22.42 сая aм.долларын санхүүжилтийг хийх бөгөөд нийт 104.5 сая ам.долларын хөрөнгө оруулалт хийгдэх аж.   2013 оны гуравдугаар сард Азийн хөгжлийн банкны Зүүн Азид хэрэгжүүлж буй 110 төслөөс сайн загварчлагдсан төслөөр шалгарсан гэгдээд байгаа энэхүү хөтөлбөр цогцоороо хэрэгжиж дуусвал нийгэм болоод инженерийн талын маш олон асуудлыг шийдэх юм. Зураг төслийн ажлаас гадна  тендерийн баримт бичиг боловсруулах, барилгын ажилд хяналт тавих зөвлөх үйлчилгээний компани болон хөтөлбөрийн менежментийн албанд дэмжлэг үзүүлэх компанийг сонгон шалгаруулахаар ажиллаж байгаа аж.
 

Холбоотой мэдээ