Улаанбаатар хотын авто замын ачааллыг бууруулах зорилгоор “Авто худалдааны цогцолбор” байгууламжийг хүмүүсийн ярьж заншснаар 22-ын товчооны  ойролцоох газарт барих болсон тухай өнгөрсөн оноос яригдаж эхэлсэн.
      Энэ нь ажил хэрэг болж “Авто худалдааны цогцолбор” орон нутгийн өмчит, аж ахуйн тооцоот үйлдвэрийн газар байгуулагдсан тухай өнөөдөр албан ёсоор мэдээлэл хийлээ. Үйлдвэрийн газрын удирдлагаар Д.Байдраг, Н.Жаргалсайхан, О.Алтанзул, Т.Энх-Улирал, Ж.Буянбаатар нарын хүмүүс томилогдсон бөгөөд цогцолборын талаар дэлгэрэнгүй танилцуулсан юм.
      Өнөөдрийн байдлаар Улаанбаатар хотод автомашин, техник, сэлбэгийн худалдаа эрхэлдэг “Да хүрээ”, “Өгөөмөр”, “Техник импортын зах”, “Дизель хүрээ”, “Цахлай”, “Дако”, “Буян хурах”, “Сутай буянт” гэсэн 9 зах 25 га талбайд үйл ажиллагаа явуулдаг. Дунджаар 8 мянга орчим түрээслэгчтэй эдгээр захаар өдөрт 6000-10000 хүн үйлчлүүлдэг нь тус захуудыг чиглэсэн автозамын ачаалал нэмэгдэх гол шалтгаан болдог байна. Иймд НЗДТГ-аас СХД-ийн 32-р хорооны нутаг дэвсгэрт 130 га газарт “Авто худалдааны цогцолбор” байгуулахаар шийдвэрлэж хэсэгчилсэн ерөнхий төлөвлөгөөг баталжээ.
        “Авто худалдааны цогцолбор” нь сэлбэг, хэрэгслийн 285 павилон, суудлын болон жийп автомашины худалдааны 1132, автобус, хүнд даацын автомашины худалдаа эрхлэх 1191 га талбайтай байх юм. Мөн авто үзэсгэлэн зохиогдох цогцолбороос гадна үйлчилгээ оффисын зориулалт бүхий 14 барилга, 42 км авто замыг барьж байгуулахаар төлөвлөжээ. Түүнчлэн  8,7 га талбайд явган хүний зам, 36,7 га газарт цэцэрлэгт хүрээлэн, ногоон байгууламж, 4.4 га талбайд авто машины туршилтын талбай, 1438 авто зогсоол барих төдийгүй хөдөө орон нутгаас орж ирэх автозамын шинэ сүлжээг төлөвлөж байгаа юм байна.  Тус цогцолбороор үйлчлүүлэх иргэдэд зориулан Улсын дугаарын тоо бүртгэлийн газрыг ч тэндэх оффисын барилгад байршуулахаар төлөвлөжээ. Мөн “Авто худалдааны цогцолбор”-ыг чиглэсэн нийтийн тээврийн шинэ шугамыг ч гаргуулах гэнэ.
      Тус цогцолборыг 5 жилийн хугацаанд бүрэн ашиглалтад оруулахаар төлөвлөж байгаа бол энэ жилийн наадмаас өмнө 14 000 автомашины талбай бүхий газрыг хатуу хучилттай болгож ашиглалтад оруулах юм байна. Үүнтэй холбоотойгоор тус цогцолборт бизнесийн үйл ажиллагаа явуулах сонирхолтой иргэн, аж ахуй нэгжийг бүртгэх ажил эхлээд байна. Бүртгэлийн ажлыг одоогоор авто худалдааны бизнес эрхэлж байгаа иргэд, аж ахуйн нэгж байгууллагуудад давуу эрх олгох журмаар  зарлаж байгаа бөгөөд  энэ лхагва гарагаас эхлэн 14 хоногийн турш бүртгэнэ. Харин  ирэх 6-р сарын 2-оос эхлэн нээлттэй захиалга авч эхлэх гэнэ.
“Авто худалдааны цогцолбор”-ын  зогсоолуудыг аж, ахуйн нэгж иргэдэд тогтсон төлбөртэйгээр эзэмшүүлэх бөгөөд хэмжээнээсээ шалтгаалан 4-9 сая төгрөгөөр үнэлэхээр болжээ. Энэхүү орлогоороо тус цогцолборын бусад бүтээн байгуулалтын ажлыг эхлүүлэх гэнэ.
Дашрамд дурьдахад ирэх 10-р сарын 1-ний өдрөөс эхлэн нийтийн эзэмшлийн зам талбай, бусад ил задгай зогсоолд авто машин, тээврийн хэрэгслийг худалдан борлуулахыг шууд хориглох юм байна.