Саяхан УИХ-ын 30-р тогтоолоор “Төсөвт өртгийг үндэслэлгүйгээр нэмэгдүүлэхэд нөлөөлсөн Зам, тээвэр, барилга, хот байгуулалтын сайдын 2012 оны 18 болон 181 дүгээр тушаалыг хүчингүй болгох арга хэмжээ авах” гэж баталсан нь барилгын салбарынхныг ихээхэн цочролд оруулав. Учир нь одоогийн зах зээл дэх барилгын үнэ өртөгийг тооцон гаргаж буй ганц норм дүрэм болох 18 дугаар тушаал хүчингүй болвол орлох баримт бичиг байхгүй энэ үед барилгын  салбарынхны зах зээлийн бодит үнэлгээ үгүй болох юм. Дээрх тушаал хүчингүй болсонтой холбоотойгоор төсвийн шинэ норм дүрэм шаардагдах бөгөөд одоогоор шинэчилж амжихгүй болохоор хуучнаараа оруулах шаардлага гарах гэнэ. Гэтэл хуучин бичиг баримт нь аль 1980-аад оны үед батлагджээ. Өөрөөр хэлбэл наяад оны үнэ ханшаар одоогийн барилгын төсвийг тооцон гаргах төдийгүй 181 дүгээр тушаал үгүй болвол мөн социализмын үеийн хөдөлмөр зохицуулалтаар ажиллах  шаардлага барилгын салбарынханд тулгарах юм. УИХ-аас дээрх тогтоолыг батлах болсон шалтгаан нь “царцсан” барилгуудтай  холбоотой бөгөөд улсын төсвөөс санхүүжилт авахдаа барилгын компаниуд төсөвт өртөгөө зохиомолоор өсгөсөн гэж үзсэнтэй холбоотой юм. Гэвч энэ нь “үнэ хөөрөгдсөн” гэж ад үзэгдсэн 2 тогтоолоос болсон  хэрэг бус өөр олон шалтаг, шалтгаан байгааг харгалзан үзэж тогтоол шийдвэрээ эргэн харахгүй бол нэгэн салбарынхан тэр чигтээ ганхаж мэдэх нь ээ.
     Иймд барилгын салбарын  төрийн бус байгууллагын удирдлагууд хамтарч харьяа яамны тодорхой албан тушаалтнууд болоод төр засгийн өндөрлгүүдэд сонордуулга хүргэхээр боллоо. Эдгээр төрийн бус байгууллагад “Барилгын хөгжлийн үндэсний нэгдсэн төв”, “Монголын барилгачдын холбоо”, “ Монголын барилгын материал үйлдвэрлэгчдийн холбоо”, ” Монголын барилгын зураг төсөл зохиогчдын холбоо”, “Барилгын инженерүүдийн холбоо”, “Барилгын төсөвчдийн холбоо”, “Барилгын үндэсний ассоциаци”зэрэг  10 гаруй холбоод хамрагдаж байгаа юм.
     Холбоодоос гаргасан сонордуулгыг салбарын голлох хэвлэл мэдээллийн хэрэгслийн хувьд “Барилга.МН” сайтад тун удахгүй бүрэн эхээр нь нийтлэх болно.