Нийслэл 5 чиглэлээр иргэдээ орон сууцаар хангана

Нийслэл  5 чиглэлээр иргэдээ орон сууцаар хангана
         Бага УИХ л гэж нэрлэж болох нийслэлийн Иргэдийн төлөөлөгчдийн хурал /НИТХ/-ын 17 дахь удаагийн хуралдаан болж, нэгэн чухал асуудлыг хэлэлцэв.
 Иргэдийн дунд хүлээлт үүсгээд байгаа “Нийслэлийн орон сууцны хөтөлбөр”-ийг НИТХ-ын гишүүдийн 87 хувийн дэмжлэгтэйгээр батласан бөгөөд Засаг даргын санаачлагаар уг ажлыг эхлүүлэхээр болсон байна.
 Уг хөтөлбөр нь нийслэлийн иргэдийг 5 үндсэн чиглэлээр орон сууцаар хангах зорилготой. Үүнд:
        Гэр хорооллыг дахин төлөвлөж барилгажуулах замаар иргэдийг орон сууцаар хангах
Гэр хороолол нь Улаанбаатар хотын 54,9 хувийг хамардаг бөгөөд үүнийг орон сууцжуулах үүднээс нийслэлийн Гэр хорооллын газрыг байгуулан ажиллаж байгаа юм. Тус газраас Улаанбаатар хотын 4168,05 га талбайг дахин төлөвлөж орон сууцжуулахаар ерөнхий төлөвлөгөөнд тусгажээ. 2008 он гэхэд 21 байршилд 78 мянган айлын орон сууцыг ашиглалтанд оруулахаар төлөвлөж байгаа аж.
    Иргэдийн оролцоотойгоор газар шинэчлэн зохион байгуулж, газар ашиглалтыг сайжруулах, газрынэ үнэ цэнийг нэмэгдүүлэх, нийгмийн болоод инженерийн дэд бүтэцтэй амины орон сууц голлосон хороолол болгон хөгжүүлэх, иргэдийн амьдрах орчинг сайжруулах
Нийслэлийн гэр хорооллыг орон сууцжуулах төсөл өнгөрсөн онд иргэдээс санал асуулга авахад дийлэнх хэсэг нь дэд бүтэц шийдэгдсэн амины сууцтай байхыг илүүд үзсэн байна. Ийм учраас дэд бүтэцтэй тохилог амины орон сууцтай болох хүсэлтэй иргэдийн санаачлага, оролцоотойгоор уг ажлыг эхлүүлж байгаа гэнэ.
     Түрээсийн орон сууцыг хөгжүүлэх замаар нийгмийн зорилтод бүлгийн иргэдийг орон сууцаар хангах
Өнгөрсөн оны байдлаар нийслэл хотод 40 мянга орчим иргэн орон сууц түрээслэн амьдарч байгаа тухай судалгаа гаргажээ. Иргэдийн орон сууц худалдан авах чадвараас хамаараад орон сууц түрээслэгчдийн тоо өсөн нэмэгдэж байгаа ч түрээсийн орон сууцны хүрэлцээ хомс, үнэ өндөртэй байгаа юм. Иймд нийслэлээс орлого багатай иргэдэд зориулж хямд үнэтэй түрээсийн орон сууц барихаар төлөвлөжээ. Энэ онд нийслэлийн төсвийн хөрөнгөөр 396 айлын түрээсийн орон сууц барьж ашиглалтанд оруулах бол ирэх онд 2064 айлын түрээсийн барилга барьж ашиглалтанд оруулахаар төлөвлөжээ.
       Шинэ суурьшлийг бий болгох замаар иргэдийг орон сууцжуулах
Одоо төрөөс хэрэгжүүлж буй орон сууцны хөтөлбөрөөс илүү уян хатан төлбөрийн нөхцөлтэй нэгэн хөтөлбөрийг нийслэлээс хэрэгжүүлэхээр болж байгаа бөгөөд энэ байгууллагыг Нийслэлийн орон сууцны корпораци /НОСК/хэмээн нэрлээд байгаа. Тодорхой орлоготой иргэд 3-5 жилийн турш өөрийн орлогоос сар бүр тодорхой мөнгийг НОСК-д өгсөнөөр орон сууцанд орох урьдчилгаа төлбөрөө бүрдүүлж байранд орох эрхтэй болох юм.
      Хуучин орон сууцны нөхцөлийг сайжруулах, шинээр барилгажуулах
Нийслэлд ашиглатын хугацаа дууссан барилгууд нэлээд хэд бий. Эдгээрийн өнгө үзэмжийг сайжруулах, үнэ цэнийг нь өсгөх, иргэдийн амьдрах орчин аюулгүй байдлыг хангахаар тодорхой ажлуудыг хийхээр төлөвлөжээ.
 
 
 

Холбоотой мэдээ