Удахгүй болох олон улсын хүүхдийн эрхийг хамгаалах өдрийг тохиолдуулан Нийслэлийн Засаг даргын тамгын газраас хүүхэд багачуудад зориулан нэгэн сонирхолтой арга хэмжээг зохион байгуулахаар төлөвлөж байна.
         6-р сарын 1-ны өдөр  Чингисийн талбайд  шоу тоглолт болох бөгөөд тоглолтонд  Монголын Хүүхэлдэйн театр, Үндэсний Дуу бүжгийн Эрдмийн чуулгын уран бүтээлчид, Монголын Хүүхдийн ордон, Хүүхдийн найрал дууны шилдэг хамтлагууд, Хөгжим бүжгийн коллеж, “Гэгээн алсын одод” уралдаанд амжилттай оролцсон сурагчид, МУГЖ А.Долгор, МУГЖ Т.Ариунаа нар оролцон ая дуугаа өргөх гэнэ. Энэ үеэр
Чингисийн  талбайг хүүхдийн баярыг илтгэхүйцээр засч тохижуулахаар төлөвлөжээ. Тухайлбал  талбайг тойруулан 12 жилийн амьтдыг байрлуулахаар ба амьтад бүр дээр чиглүүлэгчид ажиллаж, уралдаан тэмцээн зохион байгуулах юм байна.  Мөн Жангарын баатруудыг талбайн төв хэсэгт Сүхбаатарын хөшөөний баруун, хойд, өмнөд талд байрлуулах гэнэ. Чингисийн талбайд зохион байгуулах хүүхдийн баярт  хүрэлцэн ирсэн хүүхэд багачууд Бонгын найзууд, Диснейн найзуудтай хамтдаа зураг татуулах боломжоор хангагдана. Баярын албан ёсны арга хэмжээ 6 дугаар сарын 1-нд 11:00 цагаас эхэлнэ.