Шинэчлэлийн Засгийн газраас хэдхэн хоногийн өмнө “Эдийн засгийг эрчимжүүлэх 100 хоног” аянг эхүүлэх болсон тухайгаа зарлаж байсан. Түүнчлэн Ерөнхий сайдын дэргэд   “Эдийн засгийн зөвлөл” байгуулж олон ажлыг зохион байгуулахаар төлөвлөж байгаагаа ч мэдэгдсэн. 
Тус зөвлөлийн нарийн бичгийн  дарга Б.Бямбасайхан, Эдийн засгийн формын дарга Л.Лагшмин нар “Эдийн засгийг эрчимжүүлэх 100 хоног”аяны хүрээнд хийгдэж байгаа ажлынхаа талаар өнөөдөр мэдээлэл өглөө.
 Аяны гол зорилго богино хугацаанд Монголд бизнес эрхлэх орчныг улам таатай, сайн болгох бөгөөд ингэснээр богино хугацаанд өнөөдрийн эдийн засагт шаардлагатай байгаа хөрөнгийг зах зээлдээ татах боломжтой болох юм. Иймд “Эдийн засгийн зөвлөл”-өөс юуны өмнө дунд болон урт хугацааны эдийн засгийн нэгдсэн төлөвлөлтийг бий болгож, үүнд үндэслэн Монголын бизнесийн стратеги төлөвлөгөөг гаргах ажлыг эхлүүлэхээр төлөвлөж байгаа гэнэ. Монголын эдийн засагт нааштай байж болох нэгэн арга хэмжээ өнгөрсөн 7 хоногт болсон тухай ч дуулгасан. Учир нь өнгөрсөн 7 хоногт Ерөнхийлөгч Ц.Элбэгдорж БНХАУ-д айлчилж, энэ хүрээнд манай улс урд хөршдөө эрчим хүч экспортлохоор болжээ. Үүний дагуу хоёр улсын Засгийн газар, хувийн компаниуд хамтарч ажиллах бөгөөд өнөөдөр ЭХ-ний сайд М.Сономпил Хятад улсад айлчилж, Ерөнхийлөгчийн хийсэн хэлэлцээрүүдийг ажил хэрэг болгохыг зорьж байгаа юм байна.
 Түүнчлэн тус зөвлөл байгуулагдсан даруй 120 гаруй бизнес эрхлэгчидтэй уулзан санал бодлыг нь сонсчээ. Үүний үр дүнд эдийн засгийн зөвлөмж гаргахаар болсон байна. Мөн эдийн засаг хүндэрсэнтэй холбоотойгоор бизнес эрхэлж байгаа хүмүүсийн нуруун дээр том дарамт буй болсныг Засгийн газар, Монгол банкны зүгээс хэрхэн зохицуулалж болохыг судалж байгаа гэнэ. “Эдийн засгийг эрчимжүүлэх 100 хоног” аяны хүрээнд ямар ажлуудыг зохион байгуулж байгаа талаараа “Эдийн засгийн зөвлөл”-ийхөн 7 хоног бүр мэдээлэх гэнэ.
Дашрамд сонирхуулахад манай улс ирэх сарын 19-21-ны хооронд Бизнесийн дээд хэмжээний уулзалтыг зохион байгуулахаар төлөвлөж байгаа бөгөөд уулзалтанд одоогийн байдлаар Турк, Иордан, Энэтхэг, Герман, Итали, Испани зэрэг орнууд төлөөлөгчөө оролцуулахаар мэдүүлээд байгаа юм байна.