Өргөх байгууламжаас үүдсэн ослын шалтгааныг хайх замаар

Өргөх байгууламжаас үүдсэн ослын шалтгааныг хайх замаар
Барилгын салбар сүүлийн жилүүдэд эрчимжиж, монголын эдийн засгийн  хамгийн өсөлттэй байгаа салбараар нэрлэгдэх болсон. Харин өнгөтэй өөдтэй байгаа энэ салбарыг нэг л зүйл арагш чангааж байгаа нь осол аваар юм.
 Барилгатай холбоотой ослууд тэр тусмаа өргөгч цамхагийн аюулгүйн ажиллагааны норм дүрмийг хангаж ажлаагүйн улмаас үүдэн гарах ослууд давамгайлах болсон нь удирдах түвшний хүмүүсийн анхааралд өртөж, өөрсдийн гаргаж буй дүрэм, журам амьдралд хэр зэрэг хэрэгжиж байгааг шалгах үзлэгийн багийг БХБЯ-аас томилжээ. Тэр тусмаа барилгын ослын дийлэнх хувийг эзлэх болсон өргөх механизмийн аюулгүйн ажиллагааны дүрмийг хэрхэн баримтлан ажиллаж байгааг голчлон анхаарахаар болсон байна.
 Салбарын яамнаас гаргасан норматив баримт бичгийн хэрэгжилттэй барилгын талбай дээр очиж танилцах ажил энэ сарын 22- оос эхэлсэн бөгөөд үзлэгийн багт БХБЯ-ны Барилга барилгын материалын бодлогын хэрэгжилтийн зохицуулах  газар /ББМБХЗГ/-ын дарга Б.Цэдэнсамба, мөн газрын ахлах мэргэжилтэн Г. Батнэмэх, МХЕГ-ын өргөх механизмын хяналтын улсын ахлах байцаагч Н.Буйдан, НМХГ-ын байцаагч О.Сүнжидмаа, БХТ-ийн мэргэжилтэн Д.Алтанхуяг, “Өргөн тээвэрлэх машин төхөөрөмжийн үндэсний холбоо” ТББ-ын гүйцэтгэх захирал Н.Ганболд, ТББ-ын төлөөлөн удирдах зөвлөлийн дарга Г.Батсайхан, мөн ТББ-ын ажилтан Л.Туяа нарын хүмүүс багтаж байгаа юм. Ажлын байдал, албан томилолт зэрэг олон шалтгааны улмаас багийн бүрэлдэхүүн төдийлөн хамтдаа үзлэгт гарч амжихгүй байгаа аж. Энэ удаагийн үзлэгийг ББМБХЗГ-ын ахлах мэргэжилтэн Г.Батнэмэх тэргүүлж, мөн тус газрын мэргэжилтэн Ц.Батхүү, НМХГ-ын барилгын өргөх механизмын хяналтын улсын байцаагч О.Сүнжидмаа нарын хүмүүс хамтарч ажилласан юм.
БХБЯ-аас 2008 оноос хойш батлан гаргасан 7 төрлийн өргөх байгууламжийн дүрэм, 39 төрлийн норм стандарт байдаг аж. Эдгээр нь амьдрал дээр хэр нийцтэй байгаа эсэхийг уг стандарт, дүрмийг баримтлал болгон ажилладаг хүмүүсээс сонсох нь энэ үзлийн гол зорилго байсан юм. Өөрөөр хэлбэл өргөх механизмтай холбоотой осол гарах шалтгаан хаанаас эхтэй байгааг тодруулах үзлэг болов. 
Бидний хамгийн эхэнд очсон газар Төрийн орон сууцны санхүүжилтын газрын захиалгаар баригдаж буй “Буянт-Ухаа” хороолол. Уг хорооллын гүйцэтгэгч компаниар “Үндэсний бүтээн байгуулалтын корпораци” ХХК ажиллаж байгааг иргэд хэдийнэ мэдэх  биз ээ. Очих тухайгаа өмнөх өдөр нь дуулгасан боловч инженер техникийн ажилчдыг нь цуглахыг хүлээж хэсэгтээ л саатав.



Захиалагч нь төрийн байгууллага учир салбарын яамнаас гаргасан дүрэм, журмыг сайтар мэдэж бас ягштал баримталдаг байх гэж таамаглалсан ч хараахан тийм бус бололтой. Учир нь яамнаас гаргасан дүрмүүдийн нэг нь ч байсангүй.
Гэвч одоогоор “Буянт-Ухаа1” хорооллын ажил үндсэндээ дууссан учир өргөгч цамхагууд ашиглах шаардлагагүй байгаа гэнэ. Мэдээж хэрэг өргөгч цамхагууд барилгын талбайд байхгүй учир дүрэм, журмаа баримтлан ажиллаж байгаа эсэхийг нүдээр харах боломж олдсонгүй.  Харин саяхан шав тавьсан “Буянт-Ухаа2” хорооллын ажил ирэх 7 хоногоос эхлэх учир энэ үеэс л өргөгч цамхагуудаа зоох бөгөөд энэ үеэс л дүрэм, журмаа  норм стандартын дагуу баримтлан ажлахаа мэдэгдэж байна лээ.  
Нийслэлийн хэсэгчилсэн ерөнхий төлөвлөгөөний дагуу Яармаг орчмыг шинэчлэн “Шинэ Яармаг” хорооллыг барихаар болж, “Пи Ай Эм Эм” ХХК тендерт шалгарчээ.
 “Вива сити” хороололтой хаяа нийлэн босох “Шинэ Яармаг “ хороолол бидний очсон 2 дахь газар байсан юм.



БНАСУ-аас 140 гаруй ажиллах хүч оруулж ирэн их бүтээн байгуулалтыг өрнүүлж байгаа тус компанийхан “Гангар”, “Голомт констракшн”  ХХК-ийг гүйцэтгэгчээрээ сонгосон бөгөөд нийт 26 орон сууцны хороолол босгохоор зорьж байгаагаас одоогийн байдлаар 5 барилгын ажлыг эхлүүлжээ. Өргөгч цамхагуудаа хувь хүнээс түрээслэдэг гэнэ. Тэдгээрийн угсралт болоод аюулгүйн ажиллагааны хэрэгжилттэй мэргэжлийн байцаагч танилцан зөвлөгөө өгч барилгын талбайд гарч буй хүндрэл бэрхшээлийг нь сонслоо. Тус компанийхан мөн салбарын яамнаас гаргасан өргөгч механизмын норм дүрэмтэй хараахан танилцаж амжаагүй байгаа тухайгаа хэлж байв.
        Хамгийн сүүлд СХД-т баригдаж буй “Содон” хорооллын ажлын явцтай танилцав. Хүнсний салбарт тэргүүлэгчдийн нэг “Тэсо” корпорацийнхан бүтээн байгуулалтанд оролцохоор шийдэн уг ажлыг эхлүүлжээ.



Гүйцэтгэгч компаниар  “И си си”, “Дельта”, “Бутангууд” зэрэг компаниудыг сонгосон бөгөөд нийт 16 барилга баригдахаас 5-ынх нь ажил эхэлжээ. Эхний ээлжийн барилгыг 7-р сард улсын комист өгөхөөр яаравчилж байгаа гэнэ. Барилгын салбарт хийж байгаа анхны ажил учир бүхий л зүйл дээр хариуцлагатай хандаж байгаа тухайгаа  “Тесо”корпорацийн ерөнхий менежер Б.Хүдэрбаатар ярьж байсан. Тийм байдал ч ажлын талбай дээр ажиглагдаж байсан. Бүхий л зүйл эмх цэгцтэй, зохион байгуулалт сайтай. Гэвч мөн л барилгын салбарын өргөгч механизмийн дүрэмтэй танилцаж амжаагүй байлаа.
 Барилгын ажлыг гардан гүйцэтгэгч нартай уулзсаны дараа манайхны ажил нэг л уялдаа холбоо муутай юм уу даа гэх бодол эрхгүй төрөв. Яам тамгын газрынхан дүрэм журам боловсруулаад л байдаг өнөөх тоосонд дарагдаад хэн ч уншихгүй. Харин баялаг бүтээгчид чухам юуг баримталж ажиллахаа төдийлөн мэдэхгүй. Тухайлбал краныг өөр газраас хөлсөлж байгаа учир тэд үүрэг хариуцлагаа үүрнэ гээд орхигдуулах нь их байдаг байна. Гэвч тэд уг ажлыг захиалагчид болохоор хариуцлага тэдэнд л ирэх билээ.
Гэвч алдаа эндэгдэл хаана байгааг хайж байгаа нь чухал алхам бөгөөд БХБЯ-ыхан уг үзлэгээс гарсан дүгнэлтээ зөвлөлийн хурлаар оруулан тодорхой шийдвэрийг гаргах бизээ. Үзлэг энэ 7 хоногийг дуустал өдөр бүр үргэлжилнэ.
 
 

Холбоотой мэдээ