“Барилга-Орон сууц 2014” үзэсгэлэн яармагийн үеэр нэгэн сонирхолтой арга хэмжээ зохиогдсон нь нийслэлийн  барилга орон сууцны  үнийн индекс танилцуулах уулзалт юм.  Энэхүү уулзалтанд “Тэнхлэг зууч” компаний захирал Б.Батзориг  "Улаанбаатар хотын орон сууцны үнийн индексэд нөлөөлөх хүчин зүйлүүд" сэдвээр илтгэл тавив. Манай улс сар бүр ифляцийн ханшийг зарлахдаа орон сууцны үнийн индексийг тооцдоггүй байна. Харин олон улсын жишигт заавал тооцдог. Ийм учраас Монгол банк орон сууцны үнийн индексийг тооцох зорилгоор хувийн хэвшлийн судалгааны байгууллагуудад хандсан байна. Тэдгээр байгууллагын нэг нь “Тэнхлэг зууч” компани. “Тэнхлэг зууч”-ийн хамт олон Монгол банкны саналыг хүлээж авсанаас хойш 1 жил 8 сарын турш хийсэн судалгааныхаа үр дүнг товчхон тайлагнасан нь энэ юм.



      Энэхүү илтгэлийн сонирхолтой хэсгээс товчхон танилцуулахад сүүлийн үед хямрал болж орон сууцны үнэ унаж байгаа тухай ярьдаг. Гэтэл уг байгууллагаас гаргасан судалгаагаар орон сууцны үнэ өнгөрсөн 4-р сарыг хүртэл өссөн бөгөөд 7-р сарыг хүртэл ялимгүй буусан боловч 8-р сард эргээд өссөн байна. Түүчлэн дэлхийн жишгээр орон сууцыг 5 зэрэглэлд авч үздэг. Энэ жишгээр манай улсад хамгийн өндөр зэрэглэлд тооцогдох тансаг зэрэглэлийн орон сууц байхгүй байна гэж үзжээ. Мөн манай улсын өндөр зэрэглэлийн орон сууцны харуул хамгаалалтын 40 хувь нь манаачид түшиглэсэн байдаг бол дөнгөж 6 хувь нь CCTV буюу хяналтын камер суурьлиулсан байдаг гэнэ. Манай улсад хэрэгжиж байгаа орон сууцны нэг төсөл баригдахаасаа эхлээд захиалга аваад дуусах хүртлээ 3 жилийг зарцуулдаг гэсэн сонирхолтой судалгааг ч бас хийсэн байна. Гэхдээ энэ нь 1 орон сууцны барилга бус 1 төслийн хүрээнд хийсэн судалгаа юм.